Во 2023 година за евра се заменети 53 милиони германски марки, некои од нив на малку бизарен начин, иако еврото стапи во оптек пред 22 години, пишува Дојче веле, а пренесува Танјуг.

Во повеќе од 91.000 случаи годинава, германската централна банка Бундесбанк успеа да ги замени старите банкноти и монети од германската марка за евра. Од јануари до крајот на ноември се собрани нешто повеќе од 53 милиони германски марки, што е повеќе од 27 милиони евра. Тоа значи дека обемот на размена на марки во евра се зголеми втор пат по ред. Според Бундесбанката, на крајот на ноември 2023 година сè уште има нешто помалку од 12,2 милијарди марки, што е околу 6,24 милијарди евра.

Станува збор за банкноти во вредност од приближно 5,7 милијарди марки и монети во вредност од приближно 6,6 милијарди марки. Германија е една од шесте земји на еврозоната, покрај Австрија, Ирска, Естонија, Летонија и Литванија, каде неограничено време е можна размена на старата национална валута во евра.