Откако поранешниот премиер Зоран Заев на социјалните мрежи испрати „честитки за седумгодишнината од нашиот Преспански договор“ до грчкиот експремиер Алексис Ципрас, ВМРО-ДПМНЕ реагираше со една реченица:

„Она од кое паметниот се срами, недоветниот се гордее“

Заев во објавата напиша дека со Ципрас оставиле позитивен пример на Балканот, Европа и во светот со Преспанскиот договор – дека може на дипломатски начин да се постигне договор дури и за најтешките прашања меѓу државите.

„Во ова време на војни и хаос во светот, исклучително сум среќен што успеавме да го постигнеме Договорот во Преспа, да изградиме долготрајно пријателство помеѓу нашите соседски земји – Северна Македонија и Грција“, му пиша Заев на Ципрас.

Со Договорот од Преспа, потпишан на 17 јуни 2018 година, беше решен долготрајниот спор за името Македонија кој го имавме со Грција, на начин што земјава го смени името во Северна Македонија, што беше предуслов да станеме членка на НАТО, додека Грција се обврза да не ја кочи нашата ЕУ-интеграција.