Од владејачката ВМРО-ДПМНЕ велат дека ДУИ е во очај и дека лидерот Али Ахмети се враќа 24 години наназад со теми од конфликтот во 2001 година за да ја прикрие, како што велат од партијата, сопствената одговорност за корупцијата, сиромаштијата и за масовното иселување на Албанците и на другите граѓани во изминатите две децении.

„ДУИ е во очај. Штом Ахмети се враќа 24 години наназад со тезите откако, да се потсетиме, во тие 24 години, 23 беше на власт и е учесник во целото газење, компромитирање и корумпирање на институциите. Сега, по 23 години власт, му текна да зборува за 2001 година, конфликт чиишто бенефити и материјализирање најдобро го почувствуваа околу 50 луѓе од врвот на ДУИ – кои од овчари, земјоделци, механичари и од слаткари (со сета почит кон чесните носители на овие професии) – станаа шеици и тајкуни поради слабата држава и нивната перманентна закана и континуирана злоупотреба на етнички теми во ситуации кога треба да се зборува за реформи, иднина, подобар живот на граѓаните, и за борба против корупција од која тие се преплашени“, се вели во соопштението на ВМРО-ДПМНЕ.

Од ДУИ можат колку сакаат да потсетуваат на 2001 година, сега сме 2025 година, и не само што не може да ја делат Македонија, туку може и да завршат во затвор за криминал и за тоа што ја разјадуваат Македонија и ги злоупотребуваат пред сѐ своите гласачи, се додава во соопштението.

„И една друга теза, која ги повикавме Албанците да ја слушнат јасно, дали сте свесни дека додека ДУИ е на власт, овие 24 години има егзодус на Албанците (и на Македонците и на останатите, но во огромен процент на Албанците) и има толку раселени Албанци од Македонија што Ахмети дури и да ја поделел во 2001 година, сега Македонија, што ќе му останела, ќе била иста и бетер како оваа целата – сиромашна, опљачкана и празна. Ние се бориме за доброто на сите. И апелираме да не се дозволува да се инволвира јавноста во овие теми зашто Ахмети, ако не зборува за овие теми, станува безначаен, празен и гол, при што лесно се гледа неговото вистинско корумпирано лице, а и на неговите најблиски.“, велат од ВМРО-ДПМНЕ.

ДУИ без да се реформира, освен со (лидерот на СДСМ, Венко) Филипче заради тоа што се исти и со исти вредности и се одраз на еден ист ментален склоп, се наведува во соопштението, нема соговорник и публика кај никој друг во македонскиот блок, ниту, пак, некој ги сфаќа сериозно нивните потсетувања на конфликтот по 24 години нивно владеење во земјава од која остана пепел, сиромаштија и се произведоа тајкуни блиски до ДУИ и дел од ДУИ.

„Очигледно српското влијание во ДУИ е непобитно. Голем мерак имаат да бидат како оние српски скороевичи кои се збогатија на грбот на српскиот народ во време на Милошевиќ на ембарга, шверцови, рушење на државниот поредок и на општа пљачка. Нашиве српски мафијаши од ДУИ се одраз во огледало на милошевиќевите криминалци, но огледалото, во кое се огледуваат тие, е од ‘Али експрес’ и затоа делуваат во една јавност со вкус и со чувство со нормалност, трагикомично“, се заклучува во соопштението.