Во јавноста излезе нов скандал за криминалното владеење на СДСМ и на ДУИ, а судско обвинителскиот систем го крие и го заташкува, обвинува ВМРО-ДПМНЕ.

„Судството со доверба на ниво на статистичка грешка од 2% продолжува да тоне, а Љупчо Коцевски на чело на ОЈО продолжува верно да им служи и да ги штити криминалците кои го изгласаа, СДС и ДУИ. Информациите говорат дека постои Рекет 2 и дека Основното јавното обвинителство отворило предистражна постапка, но тука застанал целиот процес и предметот се ставил во фиока. Во случајот биле опфатени поранешната шефица на СЈО, Катица Јанева, и други тројца активни обвинители, кои се обиделе да рекетираат познат бизнисмен“, се вели во соопштението на ВМРО-ДПМНЕ.

Македонската јавност заслужува да знае дали овој случај се држи во фиока зашто се крие и се штити некој од СДС и од ДУИ, се додава во соопштението на партијата, и дали со тоа им оставаат простор истите да ја дефокусираат јавноста.

„Исто така, јавноста заслужува да знае дали Коцевски е на чело на ЈО за да го гони криминалот или, пак, да ги штити неговите наредбодавци од СДС и од ДУИ, па затоа во изминатата година не е поведена ниедна постапка за нивни поранешни функционери. Коцевски и ЈО да си ги оправдаат платите кои им ги даваат граѓаните и да се фатат за работа, за да ги истражат сите криминални дејствија и да донесат правда. Доста кријат во фиоки предмети за да заштитат од кривична одговорност лица блиски до СДС и до ДУИ“, порачуваат од владејачката партија.