ВМРО-ДПМНЕ не може да се откаже од своето најтвдокорно гласачко тело и затоа и натаму го турка наративот за „уставобранителите“ кои добиле драконски затворски казни за крвавиот четврток, наместо да ги осуди грозоморните настани од 27 април. Ваквиот наратив само ја турка партијата порадикално на политичката сцена и дополнително ќе ја зголеми поларизацијата во македонското општество.

Ова е оцената на политичките аналитичари откако преку протест и декларација на Патриотскиот институт на ВМРО-ДПМНЕ и на Унијата на ветерани на партијата, на петгодишнината од „крвавиот четврток“, побараа повторување на судскиот случај за настаните во Собранието од 27 април 2017 година и фер судење, бидејќи според нив, станува збор за политички осуденици.

– Наративот на ВМРО-ДПМНЕ за крвавиот четврток води до дополнителна поларизација. Тој наратив од една страна и наративот на СДСМ кој е сосема спротивен, од друга страна, ќе доведaт до уште поголема поларизација на македонското општество. Тој наратив на ВМРО-ДПМНЕ не му одговара, бидејќи не кореспондира со тоа што реално се случи на 27 април, бидејќи уште кружат фотографии и инсерти за крававиот четврток во Собранието. Тоа само ја турка ВМРО-ДПМНЕ порадикално на политичката сцена, но тоа се нивни поддржувачи. Не е првпат партии во Македонија да туркаат таков наратив, да потсетиме иста приказна туркаше и ДУИ за случајот „Монструм“. Прашање е колку ВМРО-ДПМНЕ од тоа ќе има добивка – смета аналитичарот Петар Арсовски.

Претседателот на Патриотскиот институт на ВМРО-ДПМНЕ Александар Пандов најави дека борбата за правда и слобода за „неправедно“ осудените ќе продолжи се до исправање на нанесените неправди. Тој рече дека со Декларацијата се осудува „физичкото насилство извршено од неорганизирани поединци“, но таа ја отфрла квалификацијата на делото како тероризам. Судските процеси, според Пандов, биле политички, а осудените се „жигосани без докази за делото за кое се осудени, со цел да се сее страв меѓу граѓаните и да се остваруваат политички цели, а не правда и правдина“.

Политикологот Благојче Атанасоски смета дека наместо опозициската партија да се срами од најмрачниот и најгрозоморниот ден во кусата повеќепартиска парламентарна историја на Македонија, гледаме дека се уште „го возат истиот филм”.

– Ја тераат и понатаму реториката за „уставобранители”, за толпата која разулавена и подивена влезе во законодавниот дом за да спречи формирање на ново парламентарно мнозинство. Тоа беа сцени кои дури ни во африканските земји не сме ги гледале по телевизија. Од друга страна, мене ми е јасно дека опозицискста партија не може да се откаже од тој наратив, бидејќи ако ги осуди настаните од 27 април, ќе изгуби значаен дел од своето најтврдокорно гласачко тело. Затоа е таа калкулација кај опозицискиот лидер. Најжално од сè е што лежат затвор и се осудени подведените директни извршители на злосторот, а не нивните наредбодавци, креатори и инструатори на овој грозоморен чин врз македонската кревка демократија – вели Атанасоски.

Пандов истакна дека ќе бараат од Врховниот суд, без политички притисок, да ги поништи одлуките на Основниот суд Скопје и на Апелација и да го врати судењето на почеток.

– Тоа го бараат и луѓето внатре, тие не бараат помилување, не бараат милостина, тие бараат чесно да бидат судени и да се докаже – рече Пандов.

За настаните во Собранието првично беа обвинети 33 лица кои се гонеа за делото „терористичко загрозување на уставниот поредок“. Од нив, 15 беа амнестирани со Законот за амнестија.