Најпопуларен спортски настан во САД секоја година е финалето во НФЛ лигата, Супербол, кој редовно соборува рекорди кога станува збор за гледаноста, заработката, цените на рекламите, а сега и цените на влезниците.

Годинешниот Супербол ќе се игра во ноќта помеѓу недела и понеделник на 13 и 14 февруари на стадионот Со Фај во Лос Анџелес и во него ќе играат „домашниот“ ЛА ремс и Синсинати бенгалс.

Лос Анџелес за прв пат по пауза од 30 години е домаќин на Супербол и поради тоа влезниците чинат вистинско богатство, и се  најскапи досега во историјата на финалните натпревари во НФЛ лигата.

Наевтиниот билет за Супербол се продава за 7.000 долари, додека најскапите достигнаа цена од 78.000 долари. Просечната цена на влезница за финалето изнесува 10.427 долари, што е за 2.000 долари повеќе од досегашниот рекорд од минатата година.  Суперболот во 2021 година се играше во Тампа Беј и домашниот тим баканирс во финалето го совлада Канзас сити со 31:9.