Властите во Мјанмар покренаа дополнителни обвиненија против сменетата со пуч премиерка Аунг Сан Су Чи, јавија локалните медиуми, додека, истовремено, масовните протести против воениот удар продолжија и денеска.

Су Чи е обвинета за наводни прекршувања на законот за управување со катастрофи во земјата во врска со мерките против коронавирус, се вели во извештајот на локалниот медиум „Мизима њуз”, повикувајќи се на нејзиниот адвокат Кин Маунг Зав.

Соборениот претседател Вин Маинт исто така се соочува со обвиненија за кршење на законите за управување со катастрофи, а аналитичарите оценуваат дека војската, која го спроведе пучот, сака трајно да се ослободи од него и Су Чи, пренесува ДПА.

Су Чи денеска имала видео-телефонски повик со главниот судија, според нејзиниот адвокат, кој рече дека не му било дозволено да биде присутен за време на разговорот. Следното рочиште е закажано за 1 март, рече тој.

Војската ја презеде власта со државен удар на 1 февруари, соборувајќи ја цивилната лидерка Су Чи и обвинувајќи ја за кршење на законите за надворешна трговија, откако беа пронајдени увезени воки-токи во нејзиниот дом.

Ова предизвика масовни протести низ целата земја, кои продолжија и денеска, и покрај зголемената закана за насилство.

Демонстрантите се собраа пред американската амбасада во Јангон и во близина на Централната банка, повикувајќи на враќање на цивилната влада под раководство на Су Чи и нејзино ослободување.

Учесниците на демонстрациите упатија нов повик до ООН и САД за поддршка, со многу натписи на кои пишуваше: „Ние, луѓето од Мјанмар, целосно ја поддржуваме секоја акција што ја преземаат ООН и САД”.

Минатата недела американскиот претседател Џо Бајден објави санкции против водечките генерали и придружните компании, а демонстрантите се надеваат дека и други земји ќе преземат слични активности.