Ѝ претстои ли на Македонија жешка есен и реални ли се предупредувањата за дестабилизација на државата или премиерот Христијан Мицкоски сака да ги осуети евентуалните протести и активности на Европскиот фронт предводен од ДУИ, кој не прифаќа да остане во опозиција. Мицкоски повторно предупреди на можни етнички инциденти, а информации за можна дестабилизација има и Павле Трајанов, национален координатор за спречување насилен екстремизам и борба против тероризам. ДУИ демантира каква било вмешаност во евентуална дестабилизација на државата, а безбедносни експерти повикуваат претседателката на државата да го свика Советот за безбедност.

– Имаме структури во државата, кои за да го заштитат богатството и сето она што го крадеа во изминативе седум години и го пљачкаа народот, без разлика на етничката припадност, ќе злоупотребуваат и ќе манипулираат со одредена група луѓе за да предизвика етнички инциденти. Тоа е единствениот начин да магнетизираат публика за најавената дестабилизација или организирање протести коишто ги планираат оваа есен. Не смееме како граѓани тоа да го дозволиме и како Влада и премиер апелирам до граѓаните да не наседнуваат на овие милионерски заговори – рече Мицкоски.

Иако тој континуирано предупредува за можна есенска дестабилизација на државата, претседателката на државата Гордана Сиљановска-Давкова неодамна изјави дека нема да го свика Советот за безбедност.

Трајанов за „Слободен печат“ вели дека можеби една од причините зошто шефицата на државата не го свикала Советот за безбедност е зашто тоа тело сѐ уште не е комплетирано. Но и засега нема потреба да заседава бидејќи не одлучува туку само може да изгради одредени ставови, да дава насоки. Трајанов вели дека премиерот има најмногу информации од сите служби и дека тоа што предупредува за можна дестабилизација е во насока да се мобилизираат политичките партии, но и да бидат информирани и граѓаните дека ДУИ не може да се помири со тоа дека е во опозиција.

– И јас располагам со такви информации, кои доаѓаат од луѓе блиски до ДУИ и од Албанија и од Косово. Тие имаат директни и непосредни информации од врвот на ДУИ дека се размислува за дестабилизација. И од меѓународниот фактор кој има силни разузнавачки служби во Македонија, предупредуваат на можна дестабилизација. Има најави дека се подготвуваат масовни протести, кои би можеле намерно да излезат од контрола. Тие активности во основа се во две насоки, прво, да создадат меѓуетнички тензии во државата дека наводно Албанците не се соодветно застапени во власта, и второ, ДУИ да ги мобилизира своите активисти и членови со најава дека ќе бидат на власт и партијата да ја држат во мобилност – вели Трајанов.

Предупредувањето на Мицкоски, според Трајанов, е добро како превенција и за да не наседнат граѓаните. Тој смета дека граѓаните во принцип, независно од етничка припадност, ќе бидат против какви било насилства во Македонија, но потенцира и дека е факт оти од ДУИ доаѓаат голем број бизнис-групации што биле привилегирани, но и дека голем број криминални групи што дејствувале, а имало и организирани убиства, биле под заштита на ДУИ и тие структури може да ги користи партијата. Државата, вели тој, може соодветно да реагира при евентуална дестабилизација.

– Но ниту јас, ниту кој било би сакал државата да интервенира со свои ресурси и тоа би било конфликт од пошироки размери со тешки последици. Никој не сака да има конфликт за да мора да интервенираат државните институции, односно службите за безбедност. Таквата активност дополнително ќе ги усложни работите – смета Трајанов.

Експертот за безбедност и човекови права Александар Стојановски за „Слободен печат“ вели дека ако премиерот има такви информации, тогаш не му е јасно зошто Сиљановска-Давкова не го свика Советот за безбедност.

– Не ми е јасно е зошто во континуитет премиерот излегува со такви предупредувања, а во исто време не заседава Светот за безбедност. Нема дискусија на институционално ниво на релевантните институции по однос на ваков тип сериозни предупредувања, кои сѐ додека не се адресираат како што им е редот, јавноста, останатите во политиката, меѓународната заедница не е јасно како треба да ги сфатат и секој може да ги интерпретира овој тип аларми или лажни аларми или што и да е ова. Ова не е јасно што е. Ако институциите не седнат да зборуваат и да ги извадат на маса своите информации за ваков тип процеси и не се соочат со тие информации дали се реални, тие нема да можат координирано, заеднички или поединечно да одговорат на ваков тип предизвици – вели Стојановски и прашува дали досега ништо не научивме од 2001 година и од „Диво насеље“.

Од опозициската ДУИ демантираат дека подготвуваат дестабилизација.

– Ахмети во повеќе наврати го демантираше тоа тврдење и наведе дека се сомнева оти се работи за инсцениран план на власта за наводна дестабилизација за да се дефокусира јавноста од над 100 скандали за два месеца владеење и од катастрофалните кадровски и програмски определби на Владата. ДУИ ниту планира ниту поддржува или би била дел од какви било измислени владини сценарија за дестабилизација – велат од ДУИ.