Ако се безобразни, трговците ќе бидат удрени по прстите, бидејќи Владата ќе ги следи нивните чекори и ако има девијантно однесување, ќе има и нови поригорозни мерки, што значи наместо на 100 ќе се ограничат маржите на сите производи, најави министерот за економија и труд Бесар Дурмиши. Она што е сигурно е дека одлуките за ограничување на бруто-профитна маржа на 102 групи основни прехранбени производи и за утврдување највисоки цени на 8 групи основни прехранбени производи „брои ситно“. Овие две одлуки стапија на сила на 20 февруари и завршуваат на 30 април.

Со одлуката за ограничување на бруто-профитната маржа во трговија на големо и мало на 102 групи производи или повеќе од 1.000 прехранбени и непрехранбени производи со 5 отсто бруто-профитна маржа беа млекото, лебот, брашното (тип 400 и тип 500), јајцата, маслото за јадење, јогуртот и киселото млеко, со 10 отсто бруто-профитна маржа беа 55 прехранбени производи (месо и преработки од месо, шеќер, млечни производи, маргарин, путер, конзервирани зеленчук и овошје, грав, ориз, тестенини), а со 15 отсто БПМ се продаваа 39 прехранбени производи и средства за хигиена (свежо овошје и зеленчук, детергенти, бебешка храна, пелени, сапун, тоалетна хартија и друго). Замрзнати беа цените на 8 групи основни прехранбени производи: млеко, леб, брашно (тип 400 и тип 500), јајца, масло за јадење, јогурт и кисело млеко.

Во меѓувреме трговците добија законска обврска секој ден наутро на своите веб-страници да ги објавуваат сите цени и нивните промени за секој маркет посебно. Следен чекор на Владата е изготвување софтвер за нема злоупотреби и на таа мерка, а со него граѓаните ќе лоцираат маркет и направат споредби на цени.
Според анкетата на порталот МКД.мк, граѓаните се задоволни од владините мерки, а задоволни се и премиерот Христијан Мицкоски и министерот Бесар Дурмиши. Според владините претставници, цените на храната се намалени дури и според потрошувачката кошничка на ССМ за март и тоа за 9 отсто.

– Очекувам јасна и детална анализа и набљудување на пазарот за да нема одредени девијации кога некои од трговците ќе се обидат да заработат надвор од она што е пристојно однесување, бидејќи се тешки времиња – рече премиерот Мицкоски.

Инфлацијата во март 2025 година споредено со февруари бележи намалување од -1,3 отсто, укажа на статистичките податоци министерот Дурмиши.

– Постојано работиме на мерки за подобрување на стандардот на граѓаните и стабилизација на цените. Пазарните инспектори се на терен и ако забележат енормни поскапувања, ќе има поригорозни мерки – се закани тој.

Дали новата кошничка ќе биде за три или за четиричлено семејство?

Готова е драфт -верзијата на новата минимална потрошувачка кошничка и во скоро време ќе биде претставена пред граѓаните, најави министерот Дурмиши.

– Направивме добра верзија со податоци што ги земавме од релевантните институции и со цени од повеќе трговски синџири. Работната група работи веќе два месеца и идниот месец ќе ја имаме конечната верзија, а ќе ја разгледа и ЕСС. Сè уште не е одлучено дали ќе се земат предвид потребите на три или на четиричлено семејство, разговараме на темата – најави Дурмиши.