– Владата на Соединетите Американски Држави додаде повеќе прашања на тестот за граѓанско образование што кандидатите мора да го положат за да станат американски државјани, што е најновиот чекор на администрацијата на американскиот претседател Доналд Трамп за заострување на процесот на легална имиграција, објави денес CBS News.

Овој потег ќе го врати тестот од 2020 година од првата администрација на Трамп, кој беше укинат од администрацијата на претседателот Џозеф Бајден.

Меѓу другите барања, легалните имигранти кои аплицираат за американско државјанство мора да докажат дека живееле во САД како законски постојани жители најмалку три или пет години, во зависност од нивниот случај, дека можат да читаат, пишуваат и зборуваат англиски јазик и дека имаат основно разбирање за историјата на САД и политичкиот систем.

Според новата верзија на тестот, кандидатите ќе треба да проучат 128 прашања за историјата и политиката на САД и правилно да одговорат на 12 од 20-те прашања усно.

На оние кои ќе го положат тестот им се дава втора шанса да го положат, а ако не го положат тестот по втор пат, нивното барање за државјанство ќе биде одбиено.

Новиот тест ќе се применува за оние кои ќе аплицираат за државјанство по средината на октомври, според Службата за државјанство и имиграција на САД, федералната агенција која ги разгледува апликациите од потенцијалните граѓани.