На владина седница денеска беше изгласана одлуката за испраќање 100 припадници на Армијата за учество во хуманитарна операција во погодените делови од поплавите во Словенија.

Република Северна Македонија, како и досега, продолжува да се става на располагање и солидарно учествува во разни хуманитарни мисии и акции во погодени подрачја од природни непогоди и катастрофи – се вели во соопштението од владината прес-служба.

Барањето за помош од Словенија пристигна вчера преку системот за помош и поддршка во кризни ситуации и на НАТО и ЕУ, а како што појасни министерката за одбрана, Славјанка Петровска во координација со началникот на Генералштабот и претседателот на државата изреагирале веднаш.

Петровска истакна и дека војниците се подготвени да заминат уште денеска, но во текот на попладнето ќе ги посети заедно со началникот за да се уверат дека се е подготвено и тие сепак ќе заминат утре рано наутро.

Сега засега ова е тоа што е побарано, побарани се и други технички средства за која ние не сме во можност да одговориме, но секако ако се испратат барања на кои ќе можеме да одговориме ќе одговориме – додава министерката за одбрана.

Сто македонски војници утре наутро ќе заминат во погодените области во Словенија