Владата го усвои дополнетиот ребаланс на Буџетот за 2025 година, со кој се предвидуваат дополнителни средства за неколку ресори, меѓу кои Министерството за транспорт, Министерството за социјална политика и Министерството за образование и наука.

Како што информира Министерството за финансии, со ребалансот се обезбедуваат 6 милиони денари за проектна документација за нова сообраќајница во Куманово, 50 милиони денари за исплата на социјални надоместоци и 5 милиони денари за Универзитетот „Гоце Делчев“.

Средствата се обезбедени преку прераспределба на веќе постоечките буџетски позиции без зголемување на буџетскиот дефицит. Ребалансот предвидува и дополнителни средства за зголемени плати, особено во Министерството за внатрешни работи, каде е предвиден раст од 10 проценти.

Исто така, се зголемуваат и издатоците за пензии, транзициски трошоци и капитални инвестиции во висина од 47,4 милијарди денари, со посебен фокус на проекти во Министерството за одбрана.

Со ребалансот, вкупните приходи се проектирани на 362,4 милијарди денари, додека расходите достигнуваат 403,7 милијарди денари, што претставува раст од околу еден процент. Буџетскиот дефицит останува непроменет – 41,3 милијарди денари или 4% од БДП.

Дополнетиот ребаланс ќе биде испратен во Собранието за конечно усвојување.