Косовската претседателка Вјоса Османи изјави дека има „доверливи информации“ дека американскиот претседател Доналд Трамп неодамна ја спречил можноста за евентуална ескалација на ситуацијата од Србија на Косово.

„Тој е многу јасен во својата изјава дека зборува за последните неколку недели“, рече Османи, нагласувајќи дека ова не се настани од 2023 или 2020 година, туку „настани кои се многу, многу неодамнешни“.

Како што пренесува РСЕ, Османи ги даде овие забелешки за време на предавање во Вашингтон, каде што се потсети и на нападот во Бањска од септември 2023 година, опишувајќи го како „чин на агресија“ извршен од Србија и кој, како што рече, бил „целосно подготвен во рамките на Србија“.

„Значи, не треба да ја негираме таа можност, бидејќи веќе се случило“, рече Османи, осврнувајќи се на вооружениот напад на група Срби врз косовската полиција, во кој беше убиен наредникот Африм Буњаку.

Во својот говор, Османи предупреди дека опасностите од Србија се постојани и не треба да се потценуваат.

Таа рече дека српскиот претседател Александар Вучиќ е „заглавен во начинот на размислување од 90-тите“ и дека нападот во Бањска во 2023 година е доказ за тоа.

Османи рече дека Косово тесно соработува со сите нивоа на американската влада – без разлика дали е во областа на безбедноста и разузнавањето, одбраната или политиката – со цел „заедничко заштита и зачувување на мирот“.

„Според безбедносните информации што ги добивам секојдневно, разбираме дека претседателот Трамп спречил можна ескалација на ситуацијата – ако можам така да ја наречам – неодамна. Не зборуваме за 2023 година, не зборуваме за 2020 година, зборуваме за многу, многу неодамнешни настани“, рече Османи.

Таа, исто така, ги пофали војниците од мисијата на НАТО (КФОР) во Косово, велејќи дека тие „одлично ја вршат работата во одржувањето на безбедноста и стабилноста“.

Трамп постојано го наведува своето посредништво во односите меѓу Косово и Србија како пример за улогата на САД во спречувањето на конфликти. Косово и Србија го потпишаа Вашингтонскиот договор за економска нормализација во септември 2020 година за време на првиот мандат на Трамп, во негово присуство во Белата куќа.

Тој договор, кој исто така вклучуваше и израелско признавање на независноста на Косово, не е целосно имплементиран.

Османи на предавање во Вашингтон, по повод состаноците што ги одржува во САД и односите меѓу Косово и САД, рече дека администрацијата на претседателот Трамп има нови идеи за нивно понатамошно зајакнување.

„Сакаме да седнеме со партнерите во оваа администрација за да им објасниме како Косово го има овој потенцијал. Ова е, секако, во интерес на нашиот народ, во интерес на нашата земја и во интерес на нашиот регион. Но, во исто време, тоа се совпаѓа со приоритетите на администрацијата на Трамп да ја направи Америка побезбедна, посилна и попросперитетна“, рече Османи.

Таа додаде дека на состаноците со американските претставници немало дискусија за дијалог за нормализирање на односите со Србија „за прв пат по многу години“.