Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини… се само дел од ликовите што ќе бидат дел од нашиот серијал.

Се надеваме дека на ваков начин ќе ја поттикнеме јавната свест, но и надлежните институции да издвојуваат повеќе средства за оваа намена, да најдат начин да ги промовираат нивните идеи онаму каде што треба, за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл-адреса.

Во оваа епизода на серијалот ви го претставуваме Дамиан Томовски – македонски композитор, продуцент и мултиинструменталист, кој веќе многу години живее и твори во Љубљана, Словенија.
Томоски ја опишува својата љубов кон филмската музика како нешто што потекнува од емоциите што ги чувствувал при гледање филмови, објаснувајќи дека музиката ја прави сцената жива и емоционална.

Откако како одличен ученик ги завршил Основното и Средното музичко училиште во Охрид и Струга, бил примен на Музичката академија во Љубљана, на отсек композиција и музичка теорија.

„Од таа возраст, кога бев студент, почнав активно да се занимавам, да сум на музичката сцена, за жал, не на македонската“, вели Томоски за Слободен печат.

Како професионален музички композитор кој соработувал со многу познати бендови, оркестри, пејачи и пејачки, тој со радост дојде на нашето интервју директно од Словенија, горд што пристигнал во Македонија.

Дамиан е мултиинструменталист кој ја истакнува важноста на познавањето на сите инструменти.

„Не сум голем виртуоз, но сакам да ги проучувам инструментите, затоа што секој композитор кој сака да пишува музика, мора да ги познава сите инструменти, затоа што секој инструмент има своја душа, своја мелодија“. 

Томоски ги опишува своите музички интереси како широко распространети, од класика до електроника, со големо влијание од композиторите Вивалди, Бетовен и Стравински, како и од диџеи и бендови. На македонската сцена, соработувал со уметницата  Зарина-Првасевда на песната „Будење“.

Во моментов Томоски работи на својот прв солистички албум за пијано и на проекти кои комбинираат опера, балет и перформанс. Тој верува дека искуството од животот во странство и враќањето дома е вредно.

„Од мое искуство, тоа што заминав и тоа што се враќам е нешто добро, затоа што секогаш кога ќе сретнам млади луѓе кои имаат некоја цел, некоја желба да напредуваат, нормално, секогаш државата била проблем, условите… Им кажувам, нека заминат, нека пробаат, нека научат нешто ново и ќе видат дека не е лесно да си далеку од дома…“.

Погледнете го целото интервју во продолжение: