Доаѓањето на новата прва министерка на Северна Ирска, Мишел О’нил дополнително ја размрда веќе расклатената британска политика. Нејзините најави дека земјата ќе се отцепи од Обединетото Кралство и дека ќе се обедини со Република Ирска, е нешто што може да ги замисли и Шкотланѓаните. Северна Ирска по две тешки години конечно доби своја влада, што беше поздравено од британскиот премиер Риши Сунак.

Во разговор за утринската емисија „Слободен печат“, нашата колумнистка и дописничка од Лондон, Жанета Скерлев ни раскажа за најновите случувања во британската политика и каква би можела да биде иднината за Белфаст.

„Двете историски спротивставени политички партии во Северна Ирска конечно успеаја по две тешки години да се договорат, а тоа беше заслуга на подмладоците на партиите. Мишел О’нил и Ема Литл-Пенгели се еден нов свеж бран во политиката на Северна Ирска, иако имаат контроверзно минато. Кога ќе погледнеме кои се нивните татковци и семејства, на прв поглед нема место за оптимизам, меѓутоа тоа немора да биде така, бидејќи ова се две релативно млади жени, кои очигледно знаат што сакаат, тие се високо образовани и се исклучително прагматични. Мислам дека Северна Ирска може да биде оптимист за иднината“ вели Скерлев за „Слободен печат“.

Британскиот премиер во неколку интервјуа за британските медиуми изјави дека жителите на Северна Ирска имаат право да бираат за својата иднина, што може да алудира на фактот дека во иднина таа земја може да се спои со Република Ирска, иако таквата идеја би траело подолго време.

„На Риши Сунак и Конзервативците им се тресе тлото под нозете. Изборите се ближат, а според сите анкети се вели дека тие ќе ја изгубат власта во Британија. Но, кога сме кај Северна Ирска, засега изгледа дека е стабилна нивната влада. Мишел О’нил одигра многу попаметно за разлика од нејзините предходници. Таа се појави на погребот на кралицата Елизабета, што беше незамисливо, знаејќи дека ИРА организираше бомбашки напад во кој го убија лордот Маунтбатен, вујкото на принцот Филип. Таа исто така беше на крунисувањето на кралот Чарлс, така што таа сврте нов круг во северноирската политика“ објаснува Скерлев.

Конзервативната партија, според сите достапни анкети, се соочува со голем пораз на изборите кои треба да се одржат кон крајот на годината, а опозициските Лабуристи полека се подготвуваат за враќање на власт.

Целото интервју со Жанета Скерлев погледнето го во продолжение: