Видео надзорот кој постои на граничната линија со кој се набљудува работата на службениците од полицијата, царината и другите служби не се пречка, ниту делуваат демотивирачки за овие лица, кои според перцепцијата на граѓаните, важат за многу корупирани меѓу државните службеници. Ако се спречи корупцијата на граничните премини, бенефити ќе има државата, односно економијата, зошто сивата економија го празни буџетот, а ги полни џебовите на поединци. Според проф. д-р Владимир Пивоваров кој е на функцијата Национален координатор за гранично управување од сивата економија, со обична математичка операција се губи до милијарда евра. Проблемот не е од сега, туку од првиот ден на независноста на државава.

-Имаме сериозни проблеми и откривачката дејност на органите за истрага, значи со поднесените кривични пријави. Значи истрагата е еден дел, потоа доаѓа на судење во судница каде за жал предметите вакви, високопрофилни во делот на корупцијата на граничната линија завршуваат со претежно благи казни и истите службеници се враќаат на старите работни места. Искуства од Словенија и Словачка покажуваат има и други превентивни мерки, односно кај нив службеник не може да се врати на работа додека не заврши истрагата, а имаат и добра практика на ротирање на вработените на граничната линија. Сега тоа го прави Царината, а се очекува и полицијата во брзо време, вели проф. Пивоваров во гостувањето во емисијата „Слободен печат“.

Тој се осврна и на иницијативата за воведување на полиграф како тест за интегритетот на службениците лица на границите, за која откако помина на Националниот Совет за интегрирано гранично управување, ќе биде ставена на јавна дебата по што ќе се знае нејзината натамошна судбина.

-Колку и да има превентивни мерки, колку да имате истраги и се`, никогаш не можете да сопрете корупција. Мое мислење е дека во овој момент овој е единствениот начин да се преброиме колку сме чесни на граничната линија, колку не сме чесни. Во предлогот сигурно дека ќе предложам, мора законски измени, се` тоа, да има дебата со правници, со сите. Значи јас како Национален координатор прв ќе седнам токму пред камери каде ќе сака јавноста, на полиграфот за да покажеме дека тоа не е ништо страшно. Зошто перцепцијата кај јавноста во денешно време е дека тоа е наплив на невидена корупција. Тоа е перцепција, зборувам, значи немаме докази. За да ја анулираме таа перцепција значи мора да направиме нешто конкретно, а конкретното е само, мислам во овој момент овој предлог. Очекувам дека ќе има дебата. Можеби ќе има подобри предлози меѓутоа дајте да донесеме едно заедничко решение за државата, велам да си ја спасиме државата, економијата, ако нема финансии нема да функционира ниту еден сегмент во општеството,  ни образование, ни здравство, буквално ништо нема да функционира, дециден е проф. Пивоваров.

Во однос на справувањето со корупцијата, проблем е и системот на неказнивост кој се провлекува и за овие кривични дела и кој ги поттикнува сторителите да ги повторуваат.

-Кога нешто ќе се забележи од надзорните камери имаме должност по закон да ги известиме надлежните институции, дали тој дел на работа е од царински аспект, од полициски аспект, храна и ветерина. Најфрекфентни се овие три. Инаку 12 институции има на границата. Институциите се должни да постапат, да го известат обвинителот, да спроведат постапки, дисциплинска или кривична постапка, меѓутоа најжално е кога ќе имате најеклатанти примери на корупција, докажани, видеонадзорот е веќе материјален доказ и во таква ситуација, на крај да завршуваат со некоја дисциплинска постапка. Со такво нешто се праќа еден лош сигнал кон овие лица, да и сите други останати, дека има систем на неказнивост и дека може да продолжиме, вели професорот и додава дека сегашните закони им овозможуваат на овие лица повторно да конкурираат на конкурси за истите работни места.

Полиграфот, вели  како инструмент за интегритет го користат сите безбедносни служби, кај нас во Агенцијата за национална безбедност и во Агенцијата за разузнавање.

Во таква ситуација вие ако имате еден оперативец кој преминал на другатата страна од реката или оддава службени тајни на јавноста или други  служби било каде, таквата закана има свој квантиет. Многу поголем квантитет и квалитет има онаа закана ако имаме само еден корумпиран цариник или полицаец кој може да ви пропушти некоја договорена трансакција: шлепер со мигранти, шлепер со дрога, со оружје. Сето тоа ако гледаме една паралела помеѓу заканите, мислам дека оваа закана од граничната линија е број еден во моментов за државата и од безбедносен и од економски аспект. Економскиот аспект секогаш се поврзува со безбедноста. Ако нема финансии во буџетот ќе немате и безбедност, дециден е проф. Пивоваров.

Последниот голем случај со апсењето на членови на криминалниот нарко клан од Грчец, откри дека се вмешани и гранични полицајци и цариници.

-Извешајот на Европол за истрагата за Грчец многу јасно покажува дека преку мрежата „Скај“ преку која разговарале оние што се фатени, тоа се материјални докази кои ќе се употребат, дека гранични полицајци ги пропуштале без да ги заведат во евиденцијата. Со тоа тие им создавале алиби. Ако се води во некоја земја истрага тој утре ќе докажува дека, тоа време бил во својата држава, не бил таму. Тоа се негативни работи кои мора под итно да се решаваат, вели Пивоваров.

Целото интервју со проф. д-р Владимир Пивоваров, Национален координатор за гранично управување, погледнете во продолжение: