Иако денес социјалните мрежи се начин на комуникација, вистинската конекција и понатаму се случува околу масата, во живо со пријатели, семејство и друштвени игри.
Токму на таа идеја е изграден „Гоблин – друштвени игри“, најголемата продавница за „гејмери“, „гикови“ и љубители на поп-културата во Македонија.

Таму може да се најде огромен избор: друштвени игри, карти Magic: The Gathering, Yu-Gi-Oh и Pokemon, сложувалки, Funko Pop фигури, Dungeons & Dragons, акциони фигури и многу други уникатни производи.

Покрај тоа, „Гоблин“ е организатор на турнири во Hearthstone, државни првенства во Magic и Yu-Gi-Oh, Денови на друштвени игри, „гејм-викенди“ и уште многу настани кои ја збогатуваат домашната „гејминг-сцена“.

Стартувале во една мала гаража која се развила во голема продавница чии сопственици се тројцата другари Владимир Трајчевски, Самоил Петрески и Виктор Георгиев.

-Во 2001 г. прво почнавме во една гаража. Покрај другото, се знаевме и од музиката со Самоил и Виктор, бевме членови на бендот „Чиста околина“, исто работевме и во 103-ка,“ раскажува Владимир, еден од тројцата основачи.

Тој додава дека првично сè започнало од ентузијазам и љубов кон игрите:

-Сме работеле на некои други помали работи, но прво што ни е посериозно, почнавме со „Гоблин“. Во тоа време тоа не беше некоја сериозна приказна, повеќе од ентузијастички карактер. Но со тек на време, како што се развиваше хобито во Македонија, така и нам ни стануваше повеќе и повеќе работа. Денес тоа ни е целодневна работа – вели Трајчевски.

Порано беше реткост фамилиите да доаѓаат и да бараат друштвени игри.

-Мислам дека се намали стереотипот кон игрите и повеќето сфатија дека овој дел од забавата има своја вредност – објаснува тој.

Објаснува дека сè почесто се случува луѓе на 35-40-50 години сега да почнат да играат, што порано било незамисливо. Еден од најголемите успеси на „Гоблин“ е локализацијата на странски игри на македонски јазик, иако постоеле стравови дека игри на македонски нема да бидат добро прифатени.

-Сега доаѓаат луѓе и викаат – ‘сакам Ticket to Ride на македонски’. Тоа е големо охрабрување, бидејќи локализацијата не е само превод, треба и да ја промовираш играта и да истраеш – велат сопствениците на „Гоблин – друштвени игри“.

За крај Владимир ни порача:

-Оние што играат игри, веќе знаат колку се забавни. Оние што не пробале, би сакал да ги охрабрам – пробајте, па видете сами – вели Трајчевски.