Автентични и свои во музичкиот израз, препознатливи како најуспешната ска-панк група во Македонија, „Суперхикс“ својата приказна ја започнале пред 30 години и со многу труд, љубов и малку инает успеале да ја одржат до денес. Неодамна го издадоа и најновиот студиски албум „Сила и нервоза“, а сега прославата на големиот јубилеј ќе кулминира на 29 јуни со голем концерт пред платото на салата „Расадник“ во Паркот – Кисела Вода. За нивните почетоци, кариерата и сите предизвици по патот кој го одат 30 години, во утринската емисија „Слободен печат“ зборувавме со фронтменот на бендот Петар Младеновски – Пеце.

– Како што вели еден мој пријател: „Вие сте постари од државава“. Ако тргнеме од тоа дека и државава менуваше имиња, и Устав и така натаму, можеме да се пофалиме дека „Суперхикс“ во однос на сè што се случуваше во ова држава е едно од најконстантните работи. Бендот е активен 30 години. Верувале ли не, од самите почетоци, тоа е некаде пред март 1994 година, значи крајот на 1993, а официјалната датум е 3 март 1994 година, кога е првиот настап на „Суперхикс“.

За жал, „Суперхикс“ немаат ништо за себе во моментот. Имаме една просторија, којашто ја користиме за проби и имаме своја опрема. За опремата можеме да се пофалиме дека сме богати со добра колекција на гитари, појачала и така натаму. И имаме 30 години спомени и убав живот зад нас. Тоа никој нема да ни го земе и тоа е она што не може да се купи со ниедни пари. Да не беше така, немаше да постоиме повеќе-вели фронтменот на „Суперхикс“, Петар Младеновски – Пеце.

За сите музичари во нивната кариера има таканаречен „златен период“ кога се најпродуктивни, најслушани и најпопуларни. Иако активни 30 години и „Суперхикс“ имаат ваков период, во кој се појавиле нивните најголеми хитови, кои живеат и се слушаат до ден-денес.

– Тоа е поврзано со она што се нарекува „медиумски бум“ во Македонија или она што се нарекува бум за македонската музика, не само популарната, туку и андерграунд. Бендови се протнуваа во тој период, а тоа се некаде, морам да признаам, годините од 1999-2000, до кај 2010, тие десетина години. Таа декада беше златна за македонската музика и одговорно тврдам дека за тоа имаат голема заслуга медиумите, коишто пласираа македонска музика, речиси секаде, и телевизиите, и радијата. Ако ти кажам дека сега „Сила и нервоза“, нашиот последен сингл, не знам дали воопшто е присутен на некаква македонска радио-топлиста, а дека сме присутни во Белград на „Радио 202“ и на српска телевизија со спотот, тоа кажува сè – вели Пеце.

Целото интервју со Петар Младеновски – Пеце можете да го погледнете на следниот линк: