Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини … се само дел од ликовите што ќе бидат дел од нашиот серијал.

Се надеваме дека на ваков начин ќе ја поттикнеме јавната свест но и надлежните институции да се издвојуваат повеќе средства за оваа намена, да најдат начин да ги промовираат нивните идеи онаму каде што треба за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл-адреса.

Христијан Нашуловски е млад успешен моден дизајнер. За „Слободен печат“ вели дека не може да замисли ништо што не е поврзано со облека.

-Модата и текстилот се единственото поле каде што знаев дека можам да се искажам најдобро. Имам креативен бренд под името „Нешикс“. Љубовта кон истото, кон изработката потекнува од мојата баба, не почна како моден дизајн, туку, почна како љубов кон рачно изработени работи. Тоа на почеток кога бев мал беше плетење, везење- вели Нашуловски.

За своите креации вели дека не знае како да ги дефинира.

-Естетиката моја не знам сè уште како да ја дефинирам, не сметам дека е минимална и не сметам дека е максимална. Не се работи за бои, се работи за текстури и геометрија- вели Нашуловски.

Обично, инспирацијата ја црпи од теорија, од поезија, од разговори.

-Сметам дека работењето и креирањето на некаков продукт е единствениот, најсилен момент кој за тебе зборува, и сметам дека ако не се креира нов продукт, нема ни напредок. Најважно нешто на крајот од денот е секој да биде свој- вели Нашуловски.

Целото интервју на колешката Агнеса Чаволи погледнете го во продолжение: