Кое е вашето омилено животно од Зоолошката градина – Скопје? Дали знаете како се вика, колку години има, од која земја потекнува и кога за првпат бил донесен тој вид, таа единка кај нас? Нашата Зоолошка постои од 1926 година и низ годините се развивала просторно, а растел и бројот на животните. Денес при посетата на Зоолошката градина можете да се запознаете со стотици разновидни единки, а секоја од нив крие посебна судбина.

„Слободен печат“, низ овој серијал, кој го нарековме „Лична карта на жителите на ЗОО Скопје“, ќе се обиде да ви ги доближи нивните приказни, нивните карактери и чувства. Ќе се обидеме да ви овозможиме да дознаете што јадат и која е нивната омилена храна, ќе дознаете нешто ново и забавно, поврзано со омилените сожители во главниот град.

Кан е 16-годишниот морски лав кој од бебе живее во скопската Зоолошка. Тој ни пристигна од Хрватска. По неколку години од Германија му се придружи бебето Гете, кое сега има шест години. И покрај големата разлика меѓу нив, тие одлично се дружат и меѓу нив нема поголеми инциденти, открива Зоо-негувателот Бењамин Валканов, кој се грижи за нив.

– Тие се многу мирни и мили. Иако се големи, карактерно се како мали бубачиња. Помеѓу нив нема некои големи инциденти, понекогаш Гете како помлад може да се задева со Кан, му влегува во базенот, на тој начин сака да си игра, па тогаш може Кан да се налути и да се случи некоја незгода, но ништо страшно – вели Валканов за Слободен печат.

Нашиот соговорник објаснува дека во нашата ЗОО може да се размножуваат морски лавови.

– Ние би биле среќни доколку се јави некоја зоолошка за да ни подари морска лавица, на Кан и Гете им недостасува женско друштво, а и добро би било да добиме мали морски лавчиња. Процесот на породување кај овие животни се одвива на тој начин што мајката и бебето се сместуваат во посебен базен – раскажува тој.

Го гледавме во живо тренингот на морските лавови, кој е како едно шоу за публиката. Секој работен ден од 11 часот можете да гледате на кој начин ги хранат Кан и Гете.

Погледнетe го целото видео во продолжениe: