Единствен не само во Македонија, туку и во регионот, неодамна беше отворен Центар за напредни и постдокторски истражувања на Универзитетот „Св. Кирил и Методиј“ во Скопје, а во рамките на Архитектонскиот факултет. Целта е младите истражувачи од целиот свет да можат да реализираат истражувачки престој во Македонија, преку мултидисциплинарен пристап со обврска истражувачкиот труд да го публикуваат под афилијација на УКИМ, вели за „Слободен печат“ проф. д-р Огнен Марина, декан на Архитектонскиот факултет.

– Нашата држава, а и регионот веќе подолго време се соочува со драматичен проблем – одлив на мозоци. Сите предизвици со кои се соочуваме и дополнително ќе се соочуваме не можеме да ги решиме доколку ги немаме паметните луѓе дома. Идејата за основање на центар за напредни и постдокторски истражувања е чекор во тој правец, да им дадеме поддршка на младите истражувачи од Македонија, но и од регионот, односно светот, да дојдат во Скопје и да реализираат истражувачки престој од шест месеци. Во центарот можат да конкурираат постдокторанти и докторанти кои претходно ќе дадат предлог за својата истражувачка работа. Важно е да се нагласи дека ќе работат низ мултидисциплинарен пристап на теми релевантни за нашето општество овде, но и за регионот – вели Марина.

Суштината на овој центар, додава професорот, доаѓа од една поширока платформа наречена Ректорскиот форум на универзитетите од Југоисточна Европа, каде се вклучени 33 универзитети, чија цел е засилување на можностите за научната работа со акцент на младите истражувачи.

– Ректорскиот форум постои десетина години, но во последните четири години се интензивираше неговото дејствување. Фокусот е враќање назад на младите, паметни студенти, докторанти и постдокторанти. На 30 и 31 мај оваа година во Сараево е закажана следната средба на форумот, кога ќе биде потпишан Договорот за основање на регионалната мрежа на центрите за напредни студии во кој ќе влезе и нашиот центар – рече Марина.

Деканот на Архитектонскиот факултет одликуван со Орден „Витез на Редот Ѕвезда на Италија”

Во однос на прашањето за оценката на Универзитетот „Свети Кирил и Методиј“ во Скопје, кој според ранг-листата на „Вебометрикс“ се најде на 1.598. место од 2000 универзитети, професорот вели дека тоа не се решава преку ноќ и дека е потребно многу труд за да се поправиме.

– Нормално дека би сакале да се подобри оваа слика и нашиот универзитет да се најде во најмала рака меѓу првите петстотини најдобро рангирани универзитети во светот, но тоа не може да се поправи преку ноќ. Неопходно е да се започне со сериозно финансирање на научната работа во нашата држава. Ние имаме исклучително мал процент од БДП наменет за научна работа во државата. Ќе ја споменам Србија, тие го кренаа тој процент на државно финансирање на науката околу 1 отсто од БДП, односно драматично го зголеми во континуитет и резултатите веќе стануваат видливи – вели професорот.

Оваа година се одбележуваат јубилејни 75 години постоење од првиот одржан час на Архитектонскиот факултет. Како некогашен студент на факултетот на кој денес е декан, проф. д-р Марина вели дека низ годините горд е што факултетот се менува кон подобро, се усовршува, се адаптира на современите трендови и станува омилен меѓу студентите.

– Интересот за запишување на нашиот факултет расте од година во година. Можеме да се пофалиме дека секоја учебна година конкурираат двојно повеќе кандидати од местата коишто ги распишуваме на конкурсот – вели тој.

Интересно е тоа што, низ годините, забележуваме дека поголем е бројот на женски од машки студенти на Архитектонски факултет. Тоа нè радува бидејќи „машките професии“ стануваат универзални, а нашите колешки студентки во оваа професија умешно внесуваат една креативност којашто на професијата ѝ дава поинаква димензија – појаснува Марина.

Во продолжение поглeднете го целото интервју: