Новинарките и медиумските работнички ја формираат групата, која е меѓу најзагрозените во Македонија. Затоа пред неколку дена беше промовирана неформалната мрежа – Еднаква, која треба да понуди брза поддршка за новинарките и нивните колешки, во моментите кога се кршат нивните работнички и човекови права.

– Формираме мрежа која за почеток ќе биде неформална и која ќе функционира во рамки на Независниот синдикат на новинари и медиумски работници, а всушност и иницијативата потекна од нив, синдикатот најмногу се заложи за да формираме една ваква мрежа на новинарки и медиумски работнички. Идејата потекнуваше од многу поодамна, се разговараше со колешките, ковид-пандемијата беше веројатно главниот проблем што порано не ја направивме, но дојде вистинското време конечно да ја формираме мрежата – вели новинарката Марија Митевска, која е координарот на мрежата – Еднаква.

Синдикатот е тука да ги штити работничките права на новинарите и медиумските работници, но Еднаква ќе треба да се занимава со проблемите кои ги надминуваат овластувања на синдикалната организација.

– Една од целите ни е унапредувањето на работничките права на жените во медиумите, особено што најголемиот дел од вработените во медиумите се токму жени. Тука ќе се осврнеме на проблемите на колешките коишто се различни од проблемите на машките колеги. Пошироката цел, која е различна од работата на синдикатот е дека ќе се фокусираме на онлајн вознемирувањето, бидејќи е факт дека жените во медиумите се почесто цел на онлајн вознемирување. И тоа го говорат анализите и истражувањата. Целта е секогаш да се наруши личниот интегритет на новинарката или медиумската работничка. Да се поткопа нејзината работа со нарушување на личниот интегритет. И секогаш се тоа навреди упатени кон женскиот род. Но ако го премолчиме сексизмот, ако ги премолчиме онлајн навредите од овој тип, кој вели дека тие нема да прераснат во закани за безбедноста на жените во медиумите, зашто сме имале и такви случаи досега. Со оглед на тоа дека интернетот сè повеќе е присутен и луѓето сè повеќе се информираат на социјалните мрежи, очекувано е жените во медиумите да бидат сè поголем таргет – додава новинарката на ТВ Телма.

Голем број жени биле жртва на социјалните мрежи, но ретко која од нив пријавувала онлајн малтретирање, поради недовербата во институциите. Еднаква тоа ќе треба да го промени.

– Сакаме најнапред новинарките да добијат гласност во смисла да пријават, а ако не пријават секако ние ќе го мониторираме тоа, и кога ќе застане цела една мрежа од жени во медиумите и јавно ќе каже – „таа колешка беше таргетирана од одредено лице на социјалните мрежи“, мислам дека во прво време ќе биде доволно за малку да се подигне свеста. Доколку првиот чекор не го даде посакуваниот резултат ќе преземаме и други мерки и секако ќе се обидеме на жените да им дадеме и поголема заштита, доколку тоа прерасне во нешто посериозно. Во секој случај мислам дека со гласноста ќе се стишат оние луќе кои сакаа онлајн да вознемируваат новинарки – додава таа.

Митевска открива и дека најчесто за сметка на одредени моќни лица од политиката и бизнисот, се напаѓаат новинарките кои претходно објавиле прилог и одредена истражувачка сторија која можеби не е по вкусот на моќниците.

– Во име на тие што се цел на одредена новинарска сторија или истражување, има луѓе што ќе ги заштитат со нарушување на личниот интегритет на новинарката што го сработила прилогот. Свесни сме и дека секоја политичка партија има свои тролови и ботови на социјалните мрежи, кои доволно е да видам новинарски текст кој не им оди во прилог па самите да го почнат нападот, можеби е непотребно некој да им наложи, бидејќи тоа им е практично работата – додава Митевска.

Таа додава и дека зад слободата на говорот, не би требало да се кријат луѓето што испраќаат закани и навреди и дека институциите поажурно треба да се справат со овој проблем.