Екипата на „Слободен печат“ имаше ексклузивна можност да присуствува на пробата за една од најпопуларните манифестации кај нас „Глумците пеат“, која и годинава ги обединува познатите имиња од театарската и филмска сцена во сосема поинакво светло, како музички ѕвезди.

Во прилогот ќе видите дел од атмосферата зад сцената, а ќе погледнете и како изгледа подготовката за еден ваков настан. Разговаравме со организаторката Маја Бабиќ за целиот процес од обмислување до реализација, а за своето лично искуство како учесници во целата музичка претстава ни раскажаа и неколку од глумиците кои со нетрпение ги очекуваат настапите.

„Глумците пеат“ оваа година ќе се одржи на 8 и 9 јуни во МНТ, а оваа проба само ја најавува магијата што публиката ќе ја доживее во живо со околу стотина луѓе кои работат во заднина. Во режија на Дејан Пројковски, а под диригентската палка на Љупчо Мирковски и околу 25 глумци на сцената, македонската публика ја очекува уште едно уникатно доживување полно со емоции, музика и талент.

– И покрај тоа што сум јас професионално организатор на настани 25 години, ова е нешто сосема поразлично, бидејќи има една доза на емотивност и поинаква поврзаност со настанот. Не дека не си ги сакам и другите настани што ги работам, но кога влетавме во ова со сестра ми, со целото наше предзнаење, што сме го добиле кога сме му помагале на татко ми да го прави „Глумците пеат“, сфативме дека практично многу малку знаеме. Ние знаеме како да го организираме техничкиот дел, меѓутоа дури сега сфаќам што правел тој, талентот што си го носел, тоа што бил колега со глумците, точно знаел да ја одреди мерката, кастингот, сега тоа падна на нас. И не е едноставно кога се чекори во неговите чевли. Од друга страна, обврската е многу голема, пред с кон него, потоа кон нас самите, потоа кон сите глумци и сите музичари коишто ги вклучуваме, и на крајот кон целата јавност и публиката, која ни дава огромна поддршка да го правиме ова. И не знам до каде ќе стигнеме, годинава мислам дека го правиме најдоброто наше издание, не се споредуваме, на Марин била една приказна, ова е наша. Секогаш одиме неколку скалила погоре и не знам каде ќе стигнеме со идеите, со креативноста, со желбата да направиме подобро. Ова е навистина голема продукција, нескромно, можеби најголемата приватна продукција – вели Маја Бабиќ.