Најстарата културна институција во земјава Македонска филхармонија оваа година заокружува 80 години од постоење. Бројни концерти, неограничен аплауз кој сè уште трае, публика која расте. Роденденот беше одбележан во знакот на љубовта со јубилеен концерт „80 години-Љубов“ кој го означи почетокот на новата сезона насловена „Одисеја“.

Нашата екипа беше во посета на Филхармонија, а ретроспективата ја правиме со директорот Александар Котевски.

-Оваа година на 28 ноември се случи одбележувањето на јубилејот и тоа би го издвоил како врв на новата сезона каде
како солист настапи маестро Симон Трпчевски, а со концертот диригираше Јерухам Шаровски од Израел – рече Котевски.

Огромна одговорност, но пред сè задоволство е како што вели Котевски да се работи во оваа институција.

– Македонската филхармонија поминала преку многу предизвици, оперативни, музички затоа и ја насловивме јубилејната сезона „Одисеја“. Да не заборавиме дека пред 2017 година немавме ни сопствен објект. На оваа сцена поминале плејада на истакнати инструменталисти, солисти, диригенти, јас сакам да дадам посебен акцент на оркестарот, сочинет од 90 луѓе, тие се тие кои ја даваат енергијата, без нив оваа зграда би била ништо – вели тој.

За далечната 1944 година, за денот кога десетина врвни уметници се сретнале во домот на Тодор Скаловски и со силна желба и жар започнале нешто што денеска живее и расте, Котевски зборува дека и тие како нивни наследници го чуваат тој жар.

– Ја разбирам идејата и поривот кој ги имале нашите претходници, тие тогаш во нивното време после војната,  мислеле на убаво, на музика. Има една позната изрека на Маркус Аурелиус: „Квалитетот на вашиот живот зависи од квалитетот на вашите мисли“. Замислете која мисла ја имале тие наши основачи и еве каде сме стигнале. Нашите претходници никогаш не се откажале пред ниту една препрека, предизвик, не се откажале и не дозволиле да немаме ноти, немале услови, свиреле по театри, на отворено … Денес, ние оваа генерација на колеги, вработени во Македонската филхармонија, го живееме сонот и идејата којашто била зародиш пред 80 години – вели Котевски.