Додека сè уште се чувствувал мирисот на војната во далечната 1944 година, набргу по ослободувањето на Скопје бил отворен првиот електронски медиум во Македонија. „Зборуе радио Скопје“ одекнале првите зборови во етерот со гласот на Владо Малевски. Оттогаш сè до денес, 80 години потоа, фреквенцијата на ова радио живее.
Како стожерот на општеството, расадникот на квалитетен кадар, изворот на правоговорот функционира денес, на кој начин ќе биде одбележан големиот роденден зборуваме со Наташа Андрееска- главен и одговорен уредник на Македонско радио-Радио Скопје.

-Почнавме со одбележување на 80 години постојање Македонското радио, пред 2-3 месеци, со многу ексклузивни интервјуа, со панел дискусии, со многу новинари, новинарки, аналитичари од другите медиуми. Зборуваме за радиото некогаш, денес и утре. Роденденот на 28 декември ќе го одбележиме скромно, но програмски на висина на задачата, ќе биде одлично и ги поканувам слушателите да бидат со нас – вели за „Слободен печат“ Андрееска.

Според неа, Македонското радио има огромен удел во многу сфери од нашето секојдневие и претставува сведоштво за истрајноста.

– Можам да кажам дека за тие 80 години, Македонското радио претставува сведоштво за истрајноста, за посветеноста кон улогата на радиото, како чувар на нашата култура, на нашиот литературен македонски јазик, ќе потенцирам и идентитетот. Сега, радиото е медиум кој успеа низ сите овие 80 години да помине еден пат и да ги пренесе најважните моменти од нашата историја и воедно да ги поврзе многуте генерации- вели Андрееска.

Златното доба на радиото се 50-те и 60-те години на минатиот век, кога овој медиум беше стожер на општеството.

-Можеме да кажеме дека Македонско радио-Радио Скопје во 50-те и 60-те години, беше стожер, единствен информатор, каде можеа слушателите да ги слушаат најновите вести, информации, приказни, музика … Едноставно, немаше тогаш други радија, други телевизии и беше многу убаво. Тоа беа златни времиња. Кога сите семејства се собираа околу еден радиоприемник, барем јас сум слушала од моите повозрасни, баби-дедовци се собирале околу радиото и сите заедно ги следеле натпреварите, преносите, добра музика, приказни, радиодрами пред заспивање- вели Андрееска.

Радиото отсекогаш било расадник на млади кадри, но денес ситуацијата е сосема поинаква, објаснува Андрееска, која како што вели голем број од вработените во радиото се пред пензија, а млади нема.

-Расадникот на млади кадри беше во Македонското радио. Многу познати имиња поминаа низ радиото и стана успешни во својата кариера како на пример претседателот Георги Иванов, кој беше дел од третата програма. Сега сликата во радиото е многу поинаква, но еве имаме нова година пред нас, нови почетоци, верувам дека во иднина нештата ќе се променат и на тој план – рече нашата соговорничка.

Во однос на програмата таа вели дека автентичноста на вестите во 15:30 од времето останала непроменета, а програмата е многу богата и нуди емисии за повеќе генерации. Во однос на препознатливите радиодрами, симболот на овој медиум, Андрееска вели дека од архивата се пуштат старите радиодрами.

-Пред две години Софија Гогова Врчаковска си замина. Таа беше главен носител на драмата. Си замина во пензија. Ние сè уште ги користиме нејзините придобивки. Тоа е една емисија за која слушателите ќе речат емисија за душа. Затоа што радиото ги буди и вашите емоции, немаме слика, но преку гласот правиме чуда кај слушателот. Па неретко ќе слушнете дека за некој што слушал радиодрама ќе рече дека ја гледал, тоа е умешноста на радиото да ја долови сликата пред вас. Немаме снимени нови радиодрами, но пак ќе речам, имаме нова година пред нас, времето ќе покаже – рече таа.

Многумина ќе речат дека ова радио го слуша повозрасна публика, но Андрееска вели дека се создаваат креатевни содржини кој кај помладите ќе го привлечат вниманието за да се задржат на фреквенцијата  97.3.