Фронтменот на легендарната група „Пилоти“, харизматичниот Кики Лесендриќ со својот бенд на 19 септември ќе настапи во „Јавна соба“ во Скопје. Поводот е нивната концерта средба со македонската публика на која ќе ги изведат најголемите хитови што ја обележаа музичката сцена на поранешна Југославија, меѓу кои и „Као птица на мом длану“, „Када сањамо“, „Негде дубоко ту“, „Лето“ и уште многу други.

По тој повод, направивме краток телефонски разговор со Кики, а тој не ја криеше возбудата што повторно ќе биде пред македонската публика. Го прашавме и што најмногу го врзува за Македонија и македонската публика, а тој со доза носталгичност одговори:

„Кога излезе песната „Заборављени“, а поминаа многу години од тогаш, некако во Македонија доживеа, ми се чини вистинска „експлозија“ и тогаш имавме многу концерти. Тоа беше во 90-тите години, тие блесави, воени, одвратни, но во Македонија ни беше супер и се сеќавам во Кавадарци имавме 18 концерти, ден за ден. Дојдевме само за 2, а останавме 18 дена. Така го засакав и македонското грозје, вино, девојките и убавите насмевки ми останаа во сеќавање. Така песната „Заборављени“ некако секогаш е врзана за Македонија“.

Тој додаде дека концертот во „Јавна соба“ ќе биде вистинско патување низ три и пол децении музика и песни што оставија трага кај неколку генерации.

Покрај најавата за концертот, „Слободен печат“ открива дека за време на престојот на „Кики и пилоти“ во Скопје ќе снимиме и ексклузивно видеоинтервју, во кое фронтменот ќе зборува за својата богата кариера, инспирациите и идните проекти.