„Ало должите рата во банка, ве молиме да си го подмирите долгот“. Тоа е најнепосакуваната реченица што може да се слушне на телефон. Граѓаните прашуваат со какво право банките ги даваат нивните податоци на трета фирма за да врши наплата. Одговорот го дава Катерина Бошевска, директорката на компанијата за наплата на долгови „ЕОС Матрикс“, која гостуваше во емисијата „Слободен печат“. Таа објаснува дека тие работат според закон, а и дека таква одредба има во договорите што граѓаните ги потпишуваат со банките.

– Никој не може да си дозволи да ја игнорира пред сè законската, а понатаму и моралната обврска од преземените меѓусебни односи, должничко-доверителски односи, во кои најчесто оние на кои им се јавуваме западнале од повеќе причини. Оттука ние го влечеме правото за да контактираме некој на основа на налог добиен за работа од финансиските институции, претежно соработуваме со банки. Тука се и законските прописи што го регулираат нашето работење, тоа е пред сè Законот за облигациони односи и Законот за заштита на лични податоци, со кои сме целосно усогласени. Корисниците имаат дадено и овластување кон банката во рамките на потпишувањето на нивните договори и тука тоа е законски покриено. Ние не се јавуваме доколку немаме право – вели Бошевска.

ЕОС матрикс во последниве години и откупува побарувања. Оттогаш должниците стануваат нивни клиенти. Добрата работа, објаснува Бошевска, е што престануваат да им течат каматите.

– Ние постапуваме по Законот за облигации, значи го преземаме побарувањето со пресечен датум на денот на преземање. Не сме компанија што пласира финансиски средства, оттука не пресметуваме дополнителни финансиски оптоварувања за корисниците. Од тој момент натаму постои можност доколку соработува корисникот со нас, да излезе од кругот на задолженост. Ние се трудиме да најдеме заемно прифатливо решение – објаснува директорката.

Речиси 50 отсто од обемот на портфолиото на „ЕОС Матрикс“ се преземени побарувања од банки, потоа од микрофинансиските друштва што ги даваат таканаречените брзи кредити – 30 отсто и 10 отсто се од телекомуникациски компании и други друштва. Бошевска вели дека наплатата на брзи кредити оди потешко затоа што тука станува збор и за поспецифична категорија граѓани, кои биле принудени да земат ваков кредит.

– Системот треба да помогне и обемот за работа да биде помал во рамките на микрофинансиските друштва, особено во нашиот дел на работа, што помалку граѓани да остануваат заглавени во тој систем – вели Бошевска.

Практиката за отстапување на побарувања од банките е сè поизразена во последните години.

– Охрабрувачки е тоа што банките кај нас покажуваат висока свесност за овој модел и во последните години интензитетот се зголемува. Така, можам да кажам дека последната година, по обем на преземени побарувања, е една од најуспешните, што претставува потенцијал за нашето работење во идните години. Во просек, успеваме да решиме околу 3.000 предмети годишно, тоа се 3.000 наши граѓани ослободени од своите задолжувања и тие може да бидат повторно потенцијални клиенти на нашиот банкарски систем. На годишно ниво, пак, тоа се меѓу 2 и 3 милиони евра – вели Бошевска. Но, таа забележува дека иако обемот на преземени побарувања се зголемува, не се зголемува бројот на решени случаи, што значи дека наплатата оди потешко. Притоа, истакнува дека најважно е нивните клиенти да покажат волја за соработка, затоа што секогаш се наоѓа решение. Компанијата разви и нова дигитална алатка „Мај ЕОС“, која им овозможува на оние чиј долг влегол во портфолиото на „ЕОС Матрикс“ брз пристап до нивните финансиски податоци, какви што се проверка на износот на задолжувањата, статусот на документите, следење на плаќањата и реализација на нови трансакции.

Портфолиото на „ЕОС Матрикс“ е 85.000 предмети.

Целото ВИДЕОИНТЕРВЈУ погледајте го погоре.