Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини … се само дел од ликовите што ќе бидат дел од нашиот серијал. Се надеваме дека на ваков начин ќе ја поттикнеме јавната свест но и надлежните институции да се издвојуваат повеќе средства за оваа намена, да најдат начин да ги промовираат нивните идеи онаму каде што треба за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл-адреса.

Зоран Каранфиловски е мотоциклист од Битола. Тој е петкратен шампион на Македонија во мотокрос. За „Слободен печат“ ја раскажува приказната како од механичарска работилница завршил на мотоцикл и станал шампион.

– Јас сум петпати шампион на Македонија, имам освоено многу награди. Ја претставувам Македонија и Мотоциклистичката федерација на Македонија. Многу одамна имав желба да се натпреварувам, ама немав финансии-вели Каранфиловски.

На две тркала интензивно е од пред шест години.

– Од 2018 година почнав да се занимавам професионално и да го возам македонскиот шампионат, целосно, да се појавувам на сите трки. Од 2019 година продолжив да возам и надвор од Македонија. Претходно му бев механичар на Николче Мајорот – Николче Тодоров Мајорот, долгогодишен шампион во Македонија-вели Зоран.

Поради повреда на негов колега, Иле Алабаковски, настапил со неговиот мотоцикл.

– Требаше да го заменам Алабаковски и имав добри резултати уште на првата трка. Ние имаме желба сите дечиња кои сакаат да возат, да ја претставуваме Македонија како што треба, во вистинско светло. Се надеваме дека државата ќе има слух да ни помогне, да им го отвориме патот-вели Каранфиловски.

Целото интервју на колешката Агнеса Чаволи погледнете го во продолжение: