Секој посакува среќа, но благословени се тие што умеат да ја препознаат околу себе. Понекогаш го забораваме и занемаруваме нејзиното огромно значење. Доколку човекот е свесен и размислува за среќата дотолку полесно го наоѓа патот до неа. За психологот и гешталт терапевт Тиана Ивановска среќата е субјективно доживување и нешто на кое човекот може и треба да работи сам со себе.

– Среќата е една филозофска тема за којашто не секогаш размислуваме. Често пати сме консумирани од секојдневието, трчаме по оние нешта кои се први на листа да ги средиме, да биде се под контрола и не размислуваме на подлабоките емоции, на подлабоките чувства и подлабокото задоволство од животот. Човек треба да се запраша сам себе што го усреќува и што му треба за да биде посреќен. Во ова бурно општество и време во кое живееме верувам дека мирот има голем придонес кон чувството на среќа, вели Ивановска за „Слободен печат“ на Слободна ТВ.

Финците се најсреќниот народ на светот според Индексот на среќата кој мери вкупно 137 народи. Македонците се најдоа на 87 место.

– Јас сум имала можност да го посетам Хелсинки. И прво нешто што ми падна во очи е тоа што во Хелсинки не постои „rush hour“ во сообраќајот. Имаат многу мирен сообраќај, многу мирно секојдневие, нешто што за нас е мисловна именка. Кај нас сообраќајот е еден од најчестите тригери за нервоза кај граѓаните, а нешто низ кое минува секој од нас како учесници во сообраќајот. Тогаш ќе видите како едно нешто што секојдневно го правиме може да влијае на нашето чувство на среќа. Самиот начин на којшто е организиран градот, пристапноста, улиците, целата логистичка поддршка од градот што ја добиваме или не може да влијае на нашата среќа. Не може човек да биде среќен ако му доцни автобусот, појаснува нашата соговорничка.

Според неа децата се совршен пример за спонтана среќа.

– Децата за сите нас се еден добар пример за тоа што значи една вистинска, спонтана, невина среќа. Кога сме деца немаме развиено стравови и високи цели како кога сме возрасни. Нас возрасните е малку потешко некој да нê направи среќен, затоа што кај нас има друг вид на грижи од типот на егзистенцијални, како да се преживее, вели Ивановска.

ВИДЕОАНКЕТА: Што е среќа и што ве прави среќни?

Ивановска забележува дека на анкетата на Ду за среќата сите анкетирани граѓани од третото доба одговараат дека се среќни со семејството, со внучињата. Таа појаснува дека тоа е одраз на тоа дека повозрасните граѓани во нашето општество најверојатно немаат поголем избор за тоа како би го исполниле слободното време, па го одбираат исклучиво семејството.

Целиот разговор со психологот и гешталт терапевт Тиана Ивановска погледнете го во продолжение: