Има ли Македонија генијалци и иноватори? Што креираат генијалците и по што се издвојуваат од своите врсници? Колку иновации има во државава и колку се иновативни нашите поединци, а на колку се работи? Прашања на кои малкумина го знаат одговорот. „Слободен печат“ ќе се обиде преку серијал да обезбеди барем мал дел од одговорите и да им даде шанса на генијалците и на иноваторите да ѝ ги претстават своите креации и идеи на пошироката јавност. Креатори на игри, успешни шахисти, инженери, научници, балерини … се само дел од ликовите што ќе бидат дел од нашиот серијал.

Се надеваме дека на ваков начин ќе ја поттикнеме јавната свест, но и надлежните институции да се издвојуваат повеќе средства за оваа намена, да најдат начин да ги промовираат нивните идеи онаму каде што треба, за подобро утре за сите нас. Воедно, ова нека биде и отворен повик до сите што сакаат да ги споделат своите успеси и иновации со нас, но и со целата јавност, да се пријават на официјалната имејл-адреса.

Марија Ѓорѓиева е грумер, стилист на миленици. Сопственичка е на салонот за нега и стилизирање на миленици. За „Слободен печат“ вели дека таа е типичен пример како се менуваат професии и како соништата се остваруваат.

– Не се откажувајте од соништата, затоа што јас сум еден од примерите, кој како економист, завршив во груминг-салон. Грумингот е процес кој подразбира средување и стилизирање на милениците, и е од есенцијално значење за одржување здраво нивното крзно и кожа – вели Ѓорѓиева.

Запишала курс за груминг на кучиња кој траел еден месец, а во меѓувреме се одвиваа подготовките за отворање на салон.

– Моите најблиски беа во шок, беа многу скептични, но јас во ниту еден момент не почувствував дека грешам. Кучињата се носат кај нас веднаш после сите примени вакцини, по завршување на изолацијата. Како професионални грумери, треба да го имаме предвид тоа дека кучињата ја чувствуваат нашата енергија, и затоа треба да бидеме сто отсто смирени и трпеливи за да можеме успешно да го завршиме третманот – вели Ѓорѓиева.

Таа објаснува дека кај нас во Македонија не постои можност, ниту место каде што може да се усоврши.

– Затоа сум принудена да купувам различни онлајн-курсеви, од различни земји од светот и на тој начин да го усовршувам моето знаење и моите техники и вештини на шишање – вели Ѓорѓиева.

Целото интервју на колешката Агнеса Чаволи погледнете го во продолжение: