Дина Јовановска е девојката која ја познаваме како пејачката на бендот „Рингтонс“, кои веќе десет години се дел од ноќниот живот во Скопје. На сцената таа е ведра, енергична и харизматична, токму какви што се и нивните настапи. Овој четврток, шармантната петорка од „Рингтонс“ го слави нивниот десетти роденден, со хуманитарен концерт во „Станица 26“. Средствата од концертот ќе бидат наменети за инструменти, кои ќе ги донираат во основното училиште „Браќа Рамиз-Хамид“.

– Ние решивме на ваков начин да си прославиме и зашто да не? Убаво е на некој начин да ѝ се оддолжиме на заедницата што не следи и не поддржувала сите овие години, а во исто време да направиме и убав, хуманитарен чекор. Идејата за хуманитарниот концерт, односно да собереме средства за инструменти, беше токму поради тоа што сметаме дека младите надежни музичари што сакаат да се занимаваат со музика, не секогаш имаат пристап до инструменти во училиштата. Тоа е малку отежнато во голем дел од нашите училишта, некаде воопшто немаат никаква можност за свирење. Решивме да пробаме барем на ваков начин да донираме на неколку места, па можеби некој ќе ги следи нашите чекори и ке продолжи во истава насока да помогне. Да ги поддржиме младите таленти да творат, да ја одржуваат македонската музика. Можеби некој ќе открие дека сака да се занимава со музика токму на овој начин – изјави Дина за „Слободен печат“.

На славеничкиот концерт „Рингтонс“ ќе имаат и гости, нивни колеги од македонската музичка сцена, за кои велат дека им направиле чест што ќе бидат дел од настанот.

– Огромна чест ни направија што прифатија да бидат дел од нашиот настан Лидија Кочовска, Верица Пандиловска, која прифати да дојде од Холандија конкретно за овој концерт, потоа Никола Перески – Пере од „Нокаут“, момците од „Дупер“, диџеј Славе и „Брх бенд“, односно дечињата од „Браќа Рамиз-Хамид“, коишто исто така ќе имате чест да ги видите – изјави Дина.

Иако почнале како млад средношколски бенд, сега веќе се искусни музичари со истенчен, професионален звук, што го препознава публиката која редовно ги посетува и ужива на нивните настапи.

– Ние започнавме како средношколски бенд. Така е и формиран „Рингтонс“ пред 10 години, со голем удел на ученици од средното училиште „Никола Карев“. Со тек на времето, се комплетиравме целосно, па еве сега имаме допирна точка и со основното училиште „Браќа Рамиз-Хамид“. Најпрво почнавме како бенд што свири малку по-алтернативна музика. Нашите први чекори беа во скопскиот клуб „Маракана“. Прво целта беше да почнеме да свириме некаде. Така што, на почетоците кога свиревме таму, свиревме за душа, свиревме песни што ги сакаме. Секогаш заедно сме се договарале и сме биле на иста бранова должина кога станува збор за репертоарот – вели Дина за почетоците на „Рингтонс“.

Можеби десет години не се многу, но секако не се ни малку, за тоа што „Рингтонс“ го постигнале на сцената како кавер бенд и дел од ноќниот забавен живот во Скопје.

– Еве изминативе 8 години, сме дел од настанот „Македонски шлагери“ што се одржува секој петок во „Јавна соба“. Кога почнавме пред 8 години, не бевме воопшто свесни дека тоа ќе трае до денес, на почетокот договорот беше да се направи настан што ќе трае 10 петоци, но не излезе така. Таму изведуваме само македонска музика, почнувајќи од некои познати шлагери, па с до ретро-македонски поп хитови што биле многу голем дел од моето детство и останале до ден-денес да се пеат. Така се договараме што да свириме, гледаме како реагира публиката и се прилагодуваме на тоа. Меѓутоа, навистина е изненадувачки колку и во 2024 година се пеат некои постари рефрени. Преубава реакција имаме секој пат и тоа ни дава многу енергија и желба да работиме повеќе и да правиме вакви работи – вели Дина.