Сте се запрашале ли некогаш што значи зборот катаракта? Кога некој ќе ви каже дека има перде на очите и не гледа, која е причината поради која се појавува? Дали се лекува само оперативно и колку трае лекувањето? На оваа тема зборуваме со доктор Дејан Ставриќ, хирург-офталмолог од приватната „Европска болница Санте“. Докторот вели дека катарактата е најчестата очна болест која хируршки се лекува и тоа е единствениот начин за излекување или решавање на болеста. Најчестата е старечката катаракта.

– Постојат и многу други видови, поврзани со други системски заболувања, метаболни заболувања, дијабет, автоимуни заболувања, но има и такви кои се појавуваат од најрана возраст, односно се вродени катаракти. На светско ниво, околу 61 % од вкупниот број на офталмолошки хируршки интервенции, отпаѓаат на катаракта. Таа претставува најразвиен облик на хирургијата, како методолошки, така и технолошки – вели Ставриќ.

Тој објаснува дека постојано се унапредуваат и методите за решавање на катаракта и опремата која се користи. За симптомите кои се појавуваат вели дека основен симптом, кај скоро сите видови на катаракта е кога пациентот забележува заматување, матен и намален вид, проблеми со светлата навечер.

– Тоа што го чувствува пациентот е резултат на заматување на јадрото или кортексот на леќата кое предизвикува намалување на видот. Оперативните методи се бројни, значи постои цела низа видови на операции за катаракта. Тоа е планирана хирургија, пациентите мора да знаат со каков вид влегуваат и што да очекуваат постоперативно. Зависно од причината, обликот, и степенот на катарактата, следува и соодветна хируршка метода – вели Ставриќ.

Тој вели дека за пациентите тоа е лесна операција, која се завршува со локална анестезија, трае кратко, во просек 4 до 6 минути и е амбулантска. Пациентите не остануваат во болница, туку заминуваат после интервенцијата.

– Самата предоперативна подготовка подразбира еден општ интернистички преглед, за да се превенираат, согледаат, евентуални други проблеми. Постоперативно во најголемиот дел, 99% од случаите, повеќе од час-два по операцијата пациентот се враќа во своите нормални животни навики и начин на живот. Веднаш може да излегува, да вози автомобил, да работи – вели докторот.

Тој објаснува дека катарактата еднаш се оперира, се вградува леќа и тоа значи дека пациентот доживотно нема да има проблем. Во принцип се вградува имплант на место на природната леќа, чија содржина се отстранува. Постои таканаречена секундарна катаракта, тоа се одредени заматување на самата површина на леќата, но се отстранува многу лесно, бесконтактно со ласер.

– Постоперативни компликации може да се јават во смисла на секундарен глауком, постојат и повреди или пропаѓање на самото ткиво од возраст, од дегенеративни промени, кога може да дојде до изместување на леќата. Но тоа е во мал процент – вели Ставриќ.

Тој вели дека на 31 мај во Скопје, се одржува меѓународен симпозиум на Македонското здружение на офтолмолзи и на Турската офталмолошка асоцијација со 6.000 членови. Темата на симпозиумот е напредна хирургија за катаракта и рефрактивна катаракта хирургија.

– Симпозиумот ќе биде хирургија во живо, ќе бидат пренесувани 16 операции, поделени во неколку сесии од Анкара, каде што ќе се одвиваат. Истите ќе се пренесуваат во живо во Синеплекс, и ќе бидат дискутирани од стручната офталмолошка јавност, ќе бидат претставени најновите модели на интраокуларни леќи, трифокални, мултифокални, посебни леќи за посебни потреби, ќе бидат посветени на решавање на тие најтешки случаи – вели Ставриќ.

Тој вели дека во земјава има 160 офталмолози. Условно речено има доволно, но фактички нема.

– Доказ за тоа е што нема невработен офталмолог, секоја приватна установа, па и јавните бараат човек повеќе. Луѓе секогаш фалат, па и во оваа област, нема и средномедицински персонал – вели докторот.

Тој објаснува дека барем еднаш годишно секој од нас треба да направи контрола кај офталмолог, најмалку заради катаракта, меѓу тоа повеќе заради хронични офталмолошки заболувања како глауком, кој е популарно наречен крадец на видот бидејќи пациентот не чувствува ништо.