Естетската хирургија полека го достигнува својот врв. Колку може да го спречиме стареењето и да се бориме против времето? Какви сè процедури ни овозможува пластичната хирургија? Дали имаме чувство дека сите после естетска хирургија наликуваат еден на друг? Дали во Македонија се случува некој да дојде со фотографија кај хирургот и да побара да личи на некој од познатите личности? Што е липосукција и како се прави? Како се отстранува кожа при слабеење? Утрово на дел од овие теми  разговараме со доктор Боро Џонов, пластичен хирург од приватната болница „Аџибадем-Систина“.

Докторот вели дека кај нас најчесто се бараат корекции на лице, нос, очни капаци, вградување на импланти во гради и задник… Но често после слабеење се отстранува и вишокот кожа.

– Нема разлика меѓу половите. Имаме и мажи и жени подеднакво заинтересирани за пластична хирургија. Кога сме кај градната хирургија треба да напомнеме дека третираме и трансродови лица. Имаме и такви пациенти. Жените најчесто бараат зголемување или намалување на градите, липосукција и дерматолипектомија на стомак, корекција на носот, корекција на ушните школки. Повозрасните бараат фејслифтинг, корекција на капаците, корекција со ботокс, со различни типови на филери – вели Џонов.

Корекцијата на задник најчесто се прави со трансфер на масни клетки. Што се однесува до стандардите за убавина и со тоа дека многу често пациентите наликуваат еден на друг после естетска корекција, докторот вели дека тоа се некои воспоставени норми со техниките коишто се прават, посебно за „лицевата хирургија“.

– Кога ќе видиме портрети и женски акти од сликари од минатото ќе видиме дека пропорциите на женското тело се комплетно спротивни од тоа што е модерно денес. Убавината ја наметнуваат и социјалните мрежи, полни усни, поголеми јаболкници. Но едно треба да биде јасно, ние и понатаму продолжуваме да старееме и постапките треба да се повторуваат по извесно време – вели докторот.

Кога зборуваме за пластична хирургија докторот вели дека често пациентките доаѓаат и со фотографии, им се допаднала одредена големина на гради кај некоја јавна личност, носот, обликот на очите, устата.

– Тогаш се обидувам да им објаснам што може да се направи и да се најдеме некаде на средина меѓу барањата на пациентите и она што можам да го направам. Секојдневно доаѓаат млади девојки со родители кои за полнолетство сакаат да вградат импланти. Најмлада пациентка со вградени импланти ми била токму на 18- годишна возраст – вели Џонов.

Во однос на повозрасните пациентки вели дека имал жени кои на 40 години за прв пат вградиле импланти, но имал и исклучоци кога тоа го барале и на 70-годишна возраст.

– Ако нема здравствен проблем, нема возрасна граница за пластична хирургија. Но, ако дојде пациентка на 30 години за фејслифтинг, кога буквално нема потреба, ѝ велам да почека и ѝ предлагам помошни методи како корекции со ботокс, филери или трансфер на масти – вели Џонов.

Кога станува збор за липосукцијата вели дека тоа е техника на отстранување на масни наслаги на одредени делови од телото, но не е техника за слабеење. Најчесто се прави на делови од телото каде на друг начин не може да се отстранат масните наслаги.

– Мастите се вадат од одредени делови на телото и со мала преработка се ставаат во други делови. Ако е поголема зона се прави со целосна анестезија. Мастите кои се отстранети најчесто се ставаат во задникот, за да се постигне тој бразилски облик – вели Џонов.