Околу 16.000 болни од епилепсија денес го прославуваат виолетовиот ден, ден за поддршка на лица болни од епилепсија. Вечер „Порта Македонија“ ќе биде осветлена во виолетово во чест на сите болни. Од 18 до 19 часот пред книжарница „Култура“ Клиниката за неврологија организира настан и ќе се делат информации за пациенти кои боледуваат од оваа болест, како изгледа состојбата на болниот. Во утринската емисија „Слободен печат“ за самата болест, но и за стигматизацијата на истата зборувавме со д-р Бојан Бошковски, невролог од Клиниката за неврологија во Скопје.

– Годинава настанот е под мото „Да ги скршиме бариерите, а не духот“-вели Бошковски.

За болеста објаснува дека е најраспространета невролошка болест во светот. За сите од семејството кога ќе го видат првиот напад вели дека се исплашени бидејќи изгледа страшно и сериозно кога прв пат ќе го видат болниот.

– Во тој случај пациентот треба најпрво да се спушти на земја за да не се повреди. Потоа треба да се почека да заврши нападот, а пациентот да се постави на страна за да се исцеди плуканката да не дојде до аспирација, односно да не дојде плуканката до бели дробови. Има различни типови на напад. Фамилиите се научени што треба да прават, а за тоа ќе ги советуваме попладне на настанот. Во никој случај не треба да се вади јазик. Тој кој се обидува да го направи тоа често се здобива со угриз, а на пациентот му се кршат заби или вилица-вели Бошковски.

Тој објаснува дека јазик не може да се голтне, не постои таква состојба.

За срамот вели дека ние сме општество каде таа многу лесно се шири и продира и се поддржува. За пациентите објаснува дека многу тешко ги остваруваат своите права, се соочуваат со многу проблеми на професионален план и други права во општеството.

– Но морам да признаам дека тоа се менува. Сè уште е многу рано и може многу повеќе. Секогаш ги советувам пациентите дека тие се здрави, дека имаат состојба на епилепсија, но дека тие не се ограничени ништо да прават и треба да се однесуваат нормално како сите други врсници. Треба да ја земаат терапијата редовно додека не исчезнат нападите. Нормално треба да бараат работа, да се занимаваат со спорт, да се дружат, социјализираат и да ја споделуваат својата состојба. Да знаат нивните блиски ако се случи напад како да постапат-вели Бошковски.

Тој ги советува пациентите дека мора да зборуваат за болеста за да ја намалиме срамот.

– Се случува многу често пациенти кога ќе дијагностицираме епилепсија да не споделуваат со своите работодавци затоа што тие ќе имаат погрешна слика или ќе ги исклучат од одредени процеси. Тоа не е добро. Пациентите се дискриминирани во работната средина. Не сите секако но се случува тоа и мора да се надмине-вели докторот.

Околу возачките дозволи објаснува дека ние имаме дискриминаторски закон за возење за разлика од ЕУ.

-Кај нас човек кој боледува од епилепсија не може да земе возачка дозвола. Ретко кој кај нас со епилепсија може да управува моторно возило. Тој кој нема напади и не прима лекови. Но тој нема епилепсија тој е здрав човек. Во ЕУ возат сите кои со лекови ја контролираат болеста-вели Бошковски.

Докторот вели дека од типот на епилепсија зависи квалитетот на животот на пациентот.

ВИДЕОИНТЕРВЈУ | Д-р Бошковски: Лековите не делуваат кај 30 отсто од пациентите со епилепсија и нападите се повторуваат

– Кај 30 отсто од пациентите лековите не реагираат, нападите не се намалуваат и тука е проблемот со квалитетот на животот. Околу 70 проценти од болните имаат контролирана епилепсија и тука квалитетот на животот е добар-вели неврологот.

На прашањето дали се лекува епилепсијата, Бошковски вели дека има епилепсии во адолесценцијата или во детската возраст кои можат да влезат во ремисија и да исчезнат, но ако се појават пак напади значи болеста и присутна и мора да се прима терапија.

Целото интервју погледнете го во продолжение: