Готвењето не е само секојдневна активност, туку и вистинска уметност која бара страст, посветеност и континуирано усовршување. Во оваа епизода на „Слободен печат“, имавме прилика да посетиме едно од најреномираните кулинарски- гастрономски училишта во Македонија, „FJ Culinary Consultants“.

Човекот кој стои зад оваа идеја е Филип Чаловски, долгогодишен ентузијаст и професионалец во светот на гастрономијата, кој повеќе од 20 години професионално се посветува на готвењето. Пасијата на Чаловски започнала уште во детството, гледајќи ги мајка му и баба му како готват. Учел и од стотици книги за готвење од поранешна Југославија кои ги имал дома.

– Откога знам за себе, сакам да готвам. Мојот прв контакт со тој свет на гастрономија сигурно беа книгите коишто беа на полиците во мојот дом- oбјаснува тој за „Слободен Печат“

За разлика од повеќето готвачи кои одлучуваат да се запишат на угостителски училишта, Чаловски се запишал во гимназија и подоцна завршил Факултет по историја. Меѓутоа, љубовта кон готвењето била посилна и во 2009 година, донел одлука да ја напушти канцелариската работа и да се запише на Факултет за гастрономија во Охрид.

Знаењето, истражувањето и упорноста го воделе низ многу реномирани хотели и ресторани, неговата љубов кон храната и готвењето била толку силна што решил да се посвети целосно на оваа професија, иако тоа за него значело голема промена во животот и тотална посветеност.

-Во 2016 година заминав да работам на брод. Конечно, таму го видов тој систем за кој многу читав и за кој многу се надевав дека ќе го доживеам. Истото тоа и ден денес се трудам да го имплементирам во нашите системи, во нашата гастрономија во Македонија. Не е лесно, воопшто- oбјаснува Чаловсkи за „Слободен печат“.

Чаловски додаде дека идејата за кулинарско училиште се наметнала многу природно и веќе две години станува се поуспешна.

„Ова е нешто што сакаме да добие облик во следните години на една сериозна академија. Работиме на тоа“ – објаснува Чаловски.

Во FJ Culinary Consultants готвењето не е само професија, туку и уметност која се учи, развива и пренесува на новите генерации.

-Тоа е тоа што ни дава енергија да продолжиме понатаму, да се извлечеме од кревет и во деновите кога не ни се станува- објаснува тој.