Меѓу седумте претседателски кандидати со најрадикална програма излезе кандидатката на Левица проф. д-р Билјана Ванковска. Во интервјуто за „Слободен печат“ додава и дека програмата е романичарска, но и конкретна, со раскинување на договорите како Преспанскиот и Бугарскиот за кои вели дека „не се исклесани во камен“ па да не можат да променат. Заговара дури и излегување од НАТО зошто нејзината визија е Македонија мирољубива и немилитаризирана.

-Некои велат дека нудам најрадикален концепт и најконкретен, јас не заобиколувам па да спомнам Преспа во програмата па потоа да не образложам што мислам во однос на тоа, односно кои би биле импликациите, исто во однос на промена на Устав. Оваа рамковна демократија која се претвори во етнотрибалистичко општество, практично општество на квоти и слично. Значи јас ги детектирав проблемите и ги нудам решенијата. Мислам дека граѓаните и здраворазумски разбираат дека вака како што сме тргнати не одиме никаде, дека ова се некои од болните точки, зборувам од позиција на иден шеф на држава, секако, кога би се кандидирала за друго би имала можеби друг спектар на лекарства што би се понудиле. Меѓутоа мојата визија е Македонија мирољубива, немилитаризирана, Македонија која води прво сметка за себе и своите граѓани, а потоа за туѓите геостратешки интереси, Македонија која ќе ги искористи своите ресурси и она малку што остана, не можеме да го даваме, да бидеме колонија и да го даваме на туѓи корпорации, да го распродаваме тоа што го имаме. Имаме и вредни луѓе, и умствено и физички кои сакаат да работат и тоа е една визија која може делува и романтично, идеалистички меѓутоа јас мислам дека токму тоа се едноставните решенија за навидум клучни и сложени прашања, вели проф. д-р Билјана Ванковска.

На прашањето што би се случило доколку овој концепт го поддржат граѓаните и професорката биде избрана за претседателка на државата, таа појаснува:

-Сето ова што го направивме досега го направивме со верба дека ќе ни се врати со благосостојба. Дека дури и она што не боли ќе биде залечено. Дури ми се чини и малку брутално кога духовните вредности, националните ги жртвувате за полниот стомак, би рекла баш онака марксистички. Мојата парола е „Враќање на достоинството на нацијата“ и мислам дека оној кој себе се понижува, станува просјак, се лишува од се што неговите дедовци и прадедовци му го оставиле за да се приклони до моќните и богатите на крајот јаде горчилив леб и легнува со нечиста совест и со прашање: за што јас се продадов? Моите солуции се, не поништување туку раскинување на Преспанскиот, на Бугарскиот договор. Тоа се работи кои се формално правно можни. Значи постојат и меѓународно правни основи, уставно – правни механизми. Сепак се договори, не се вклесани во камен. И сега што би ни се случило? Јас мислам дека досега се правиме за некако да се заштитиме, а не за некако да добиеме бенефит. Јас би тргнала чекор по чекор. Прво да не се плашат нашите потенцијални гласачи овде мора во една програма да го кажете сето тоа. Меѓутоа планот на реализација би се одвивал во фази. Петгодишен мандат е. Некои ми велат, ама да не е многу за петгодишен мандат, јас велам, има и втор мандат. Битно е едно зрнце да поместиме кон подобро, а тоа ќе предизвика лавина, односно ќе ни ја врати самодовербата дека нештата некогаш зависат и од нас, не само од некои други фактори, нагласува проф. д-р Ванковска.

На прашањето дали гледа сојузници на политичката сцена за реализација на нејзината програма доколку биде избрана за претседателка на државата, потенцира дека сепак ќе има можност да предизвика промени во корист на граѓаните.

-Како инокосен орган, како индивидуален орган претседател на државата вие добивате директен легитимитет од народот. Нели обично велам и немам машинерија. Мојата машинерија е народот кој органски разбира што зборувам, здраворазумски. Значи јас ја имам таа поддршка и таа е најважна. Дали другиве сојузници, зборуваме за политичките актери, нели елитата, тие ќе треба да се преиспитаат затоа што сите тие тврдат дека зборуваат во име на народот. Ако мојата агенда победи, тогаш победува една друга визија за Македонија која нив ќе ги стави во една незгодна ситуација. Јас дури и да не успеам во сите мои ставови, во нешто да успеам, велам јас ќе бидам во кохабитација со која влада и да е. Јас нема да бидат фината дипломатка, која заедно со лидерот на партијата ќе решава проблеми, не напротив, ќе бидам оној субверзивниот елемент кој на овие носители на власт кои досега зајдоа, 30 години се менуваат на власт, јас секогаш ќе имам морално и политичко право и демократско да им укажам дека прават нешто што е на штета на граѓаните, вели Ванковска.

Очекува на престојните претседателски избори граѓаните да се мобилизираат, да направат бунт и да се пресметаат со политичките елити кои досега се менуваа во власта.

-Општеството ни е поделено, поларизирано, партизирано, меѓутоа зависно и неслободно. Она што јас го очекувам и на денот на првиот круг, потоа и на вториот круг е дека зад параванот оној граѓанин на кој му е смачено да го третираат како гласачка машина, да го качуваат по автобуси, да го шетаат, да го уценуваат со вработувања, со социјална помош, сето тоа. Јас очекувам бунт, јас очекувам еден момент во кој кога човек е сам со себе и со својот избор ќе рече: доста ми е од ова, сакам да пробам на оваа жена да и дадам шанса да зборува во мое име. Така што јас многу не се грижам за овие олигархии и елити коишто се заседнати и затоа и ги предизвикувам на двобој, на дуел, на дебата во смисла да видиме дека тие бранат една парадигма, јас имам друга. Народот ќе одлучи на крајот, нели. Такашто рано е однапред и самата на себе да си викам не, не тоа не е возможно ниту пак граѓаните да викаат: а ова нема да успее, оптимист е Ванковска.

За идејата за промена на Уставот на државата со нов концепт – граѓански, проф. д-р Билјана Ванковска зборува во интервјуто во продолжение: