Министерството за животна средина треба да инвестира од еден милион до еден и пол милиони евра за целосна санација и функционирањето на хидросистемот „Ѓавато“ за полнење на Дојранското Езеро, вели за „Слободен печат“, градоначалникот на Општина Дојран, Анго Ангов. Загрижува нивото на нашето најмало природно езеро, моменталната состојба е 62 сантиметри под дозволеното ниво, додава тој.

– Хидросистемот е во лоша состојба, потребна е итна реконструкција. Во моментов функционира со 400 литри во секунда коишто се испумпуваат во Дојранското Езеро, а прашање е дали стигаат некаде околу 50 литра. Ефектот од неговото лошо функционирање ќе се види претежно во летниот период. Во повеќе наврати се обративме до Министерството за животна средина, меѓутоа, од она што сум запознат, беа одбиени амандманите и нема обезбедени средства во самиот буџет за негова санација. Се надевам дека со некој ребаланс или со друг тип финансирање ќе се обезбедат средства – вели Ангов.

Тој додава дека за подобрување на состојбата на Дојранското Езеро, Општината влијаела и со изградба на нова модерна пречестителна станица и со санирање на дотраениот колекторски систем.

– Колекторскиот систем беше саниран, односно беше саниран на база на ЦИП метода, односно „цевка во цевка“. Беа обезбедени пари од Владата и од словенечката амбасада. Изградбата на модерна пречистителна станица е веќе завршена, во план е да почне да функционира пред летната сезона. За двата проекта имавме обезбедени некаде од околу 4,5 милиони евра – рече Ангов.

Влегувањето во Дојранското Езеро е безбедно

Дојранскиот градоначалник стои цврсто зад тоа дека водата во езерото е чиста. Тој се повикува на низа контроли на Институтот за јавно здравје (ИЈЗ), но за оваа проблематика, како што вели, биле ангажирани и странски екепрти.

– Како што доаѓа летната сезона, редовно се активира ова прашање. Мислам дека тоа е некоја заднина со која што се сака навистина да се влијае лошо на реномето на дојранската туристичка дестинација. Имаме редовни контроли од ИЈЗ кој на секои две недели го контролира квалитетот на водата во езерото. Работиме Дојранското Езеро да биде бистро и убаво. За таа цел имаме многу партнери. Амбасадата на Република Словенија ни е стратегиски партнер кој секоја година ни обезбедува финансиски средства, а знаеме дека Словенија е држава која е лидер во управувањето на водените ресурси – вели Ангов.

Дојран, како што вели Ангов, ја доживува својата ренесанса. Во последно време расте заинтерсираноста за купување земјиште и недвижнини на територијата на Општината, за реконструкција на стари и значајни објекти, а сето тоа, според него, дополнително ќе влијае на развојот на овој македонски крај, не само во лето, туку и во зимките денови.

– Десеткратно е зголемен данокот на промет, а тоа е покззател дека Дојран се движи во нагорна линија. Старите објекти што беа запоставени со години, сега се купени, како саат-кулата, црквата Свети Илија, турската бања. Дојран доживува една ренесанса, возобновување, туристичката понуда е зголемена. Од 1 март почнуваат и новите туристички тури што ги организира новото јавно предпријатие, така што Дојран ќе живее во текот на целата година – вели тој.

За време на пандемијата, Дојран доживеа туристичка експанзија, а 2020 година е рекордна по бројот на посетители – повеќе од 150 туристи, и тоа домашни туристи, како што вели градоначалникот. Еден од најголемите проблеми со кои се бори Општината е туристичката такса.

– Во однос на нашиот буџет, единствената ставка која ја добиваме од туристите е туристичката такса. Меѓутоа, туристичката такса некако се запоставува. Не успеавме да ја подигнеме свеста, и тоа претставува серизоен проблем. Најголем развој бележиме во порастот на данокот на промет и во продажбата на градежно земјиште. Поконкретно, успеавме буџет од некои 400-500 илјади евра пред 2020 година да го зголемиме на околу два милиони евра. По глава на жител сме број еден општина за остварени приходи. Од Светска банка сме рангирани на прво место, Општина која е во можност да земе кредити и истиот да го исплаќа, бидејќи сме без долгови – рече тој.

Странските инвестиции од различни земји се присутни во Општината.

– Најинтересна понуда имаше од израелска компанија, која што сакаше да инвестира во туристичко-здраствен туризам. По сите испитувања што беа направени, Дојран има медитеранска клима, што е идеална за белодробните заболувања и тие сакаа да носат експерти за изградба на болници, но тој проект не успеа, бидејќи наидовме на институционален проблем со кој најчесто се соочувам. Таа туристичко развојна зона, која беше под Агенцијата за туризм, а ја носи Министерството за транспорти и врски. Тука наидуваме на пречки, на застој, и не може да тргнеме на мртва точка. Мене најголем проблем во оваа седумгодишна работа колку што сум градоначалник ми е токму работата со Министерството – вели Ангов.

Во Дојран, цената на еден квадрат неизградено градежно земјиште се движи од 40 до 50 евра, а за готови станови, објекти, цената достигнува и повеќе од 1000 евра.

Ангов за „Слободен печат“ изјави дека нема да се кандидира трет пат да стане градоначалник на Дојран.