Треба да се детектира вистинскиот проблем за растот на цените, место да се бојкотираат продавниците, смета претседателот на Сојузот на стопански комори Трајан Ангелоски, кој гостуваше во емисијата „Слободен печат“. Тој вели дека анализите што ги направила Комората, покажуваат дека најмногу цените ги креваат добавувачите, а не трговците. Ангелоски потсетува дека ние сме високо увозно зависна земја и потенцира дека токму на тоа поле треба да се работи. Во однос на кредитот од Унгарија, членките на ССК покажале интерес за позајмување пари, но според претседателот, спорно е зошто да се даваат пари за изградба на фотоволтаични централи, ако Министерството за енергетика тврди дека ќе се јави проблем во мрежата, која нема да може да ги прифати сите тие количини.

Ангелоски смета дека бојкотот на маркетите има негативни последици врз сите.

– Училиште, болници и сè друго се финансира од даноците што ги плаќаме сите, а кои ќе бидат помали со намалениот промет. Со бојкотот им нанесуваше штета и на маркетите и на добавувачите на производи, кои ги носат тие производи во маркетите. На еден рационален и разумен начин треба да се пристапи кон анализа зашто одредени цени во изминатиот временски период имаат таков нагорен тренд на зголемување. Според анализите што ние ги имаме во нашата комора, тоа се должи, пред сè, на тоа што сме земја што се потпира на голем увоз на прехранбени производи, бранот дефинитивно дојде однадвор – од добавувачите на странски прехранбени производи и одредени трошоци што се појавуваат поради овие глобални кризи што настануваат во светот, поради одредени земјоделски производи или полупроизводи кои, за жал, ги немаме во доволна количина – рече Ангелоски.

Во однос на обвинувањата дека постојат монополски здружувања на производители, или трговци за формирање на цени, Ангелоски вели дека еден период такви изјави слушнавме и од политичари иако произволни.

– Доколку некој смета дека има картелско здржување, постојат колку-толку некои институции. Некој нека пријави картелско здржување, и ние, нормално ќе поддржиме да се докаже доколку навистина постои тоа картелско здружување. Меѓутоа, ние во овој момент не можеме да детектираме такво картелско здружување – вели Ангелоски.

Тој потенцира дека трите основни постулати на една независна држава е да имате чиста вода за пиење, да имате сопствено производство на храна и да имате сопствено производство на енергија.

– Дефинитивно, со субвенциите работата е речиси па промашена. Мислам дека е дојдено вистинското време маркетите полека но сигурно да ни ги обележат и јасно да ни ги декларираат производите, за да на пример користиме домашен зеленчук. А за да се поттикне неговото производство, големите маркети треба да влезат во кооперантски односи со овие производители на храна – потенцира Ангелоски.

Претседателот на ССК даде позитивна оценка за кредитот од Унгарија, сметајќи го како позитивен импулс за задвижување на еден инвестициски циклус.

– Нашите членки комуницираат со одредени банки, вршат одредена подготовка за доставување на соодветната документација што е потребна за овој кредит. Овој кредит секако ќе значи за голем број компании квалитетно финансирање, особено во контекст на роковите на исплата на овие кредити кои се на 15 години, а досега такви кредити во бизнис-секторот речиси и да не постоеја. Каматата е навистина една од најповолните што во овие услови може да се добие – рече Ангелоски.

Целото ВИДЕОИНТЕРВЈУ погледајте го погоре.

АНАЛИЗА: Супермаркетите важен фактор за вработеноста, но производителите генерираат високи профити со помалку работници