Каков е животот на лицата со попреченост во државава, се вложува ли доволно во инфраструктура за да се олесни движењето на истите, доволен ли е надоместокот што го добиваат лицата со попреченост, има ли дневни центри за инклузија и дали градот има предвидено пари за оваа намена во утринската програма на „Слободен печат“ одговор побаравме од Суаред Алишан претседател на од коалицијата „Менуваме“.

– Отворање на Дневен центар е неопходно за лицата со попреченост. Коалицијата „Менуваме“ во месец јули беше принудена да спие пред Владата во паркот со шатори. Барањата ни беа јасни во однос на центрите за лицата со попреченост. Реагиравме и во однос на додатоците, во однос на центрите за рехабилитација и инфраструктурата, односно пристапот на лицата до објектите. Во јули беше донесена иницијатива да се изгради регионален центар за нашите потреби-вели Алишан.

Тој објаснува дека центарот бил креиран лично од нивна страна како организација и бил комплетно подготвен. Идејата била нивна, а центарот требало да ги задоволи нивните потреби и барања.

– Нашата органицазија чекаше шест месеци да се изгласа буџетот на градот. Буџетот се донесе многу чудно, немаше ставка во тој буџет за дневните центри за лицата со попреченост, немаше ставки предвидени за доградба или изградба на постоечките надворешни објекти од времен и траен карактер. И немаше пари за дневниот центар. Иницијатива беше изгласана и тука се застана-вели Алишан.

Но следувало изненадување. Дознал случајно дека се гради дневен центар во една скопска гимназија и тоа во подрумските простории.

– Дали заслужуваат лицата со попреченост за завршат во подрум, центарот од 600 м² да се намали на 50 м². Да се прескокнат еден куп процедури? – прашува Алишан.

Во моментов нема проект изгласан од Советот на град Скопје, нема план кои луѓе треба да бидат вклучени во дневниот центар и кој ќе работи.

– Советот требаше да донесе одлука за формирање на мешовита установа 51 отсто град Скопје, 49 отсто коалиција „Менуваме“. Требаше да се делат одговорностите. Ако центарот треба да работи две смени средствата за прва смена требаше да ги обезбеди градот Скопје, за втора смена ние. Од таков фамозен проект кој требаше да биде 600 м 2 завршивме во подрум од 50 квадрати-вели Алишан.

Според него во моментов траат градежните работи, се гради центарот во подрум на гимназијата „Јосип Броз Тито“.

– Ова е дивоградба објект, нема премер, нема план, нема фирма која го гради не знаеме со кои пари се гради. Без јавен тендер се гради, децата се ставаат во подрум од гимназија заедно со 1.200 деца кои кога ќе излезат на одмор од училиштето и ќе направат врева ќе ги вознемират децата со попреченост. Од наша страна ќе следи кривична пријава и за градоначалничката Арсовска и за директорката на гимназијата. Сите критериуми се прескокнати. Од Арсовска немаме никаков одговор откако е градоначалничка, најдискриминирана организација сме-вели Алишан.

Дневниот центар не може да биде во подрум на училиште, вели Суаред и најавува нова локација за ГТЦ или во некоја од катните гаражи, каде има канцеларии.

– Ние за подрум не сме, ако милува градоначалничката нека си ја префрли канцеларијата во подрумот на гимназијата, нека ни ги даде нејзините канцеларии за лицата со попреченост и така има парк децата да уживаат, ќе бидат побезбедни-вели Алишан.

Целото интервју погледнете го во продолжение: