Во Скопје денеска постојат три подземи премини, од кои два се сместени во населбата Автокоманда. Премините се направени пред скоро половина век и теоретски, нивната улога за олеснување на траекторијата на движење на средношколците, студентите и сите останати пешаци е несомнено важна. Сепак, во пракса, премините под булеварот Александар Македонски во населбата Автокоманда со години се недопрени од раката на општина Гази Баба и Град Скопје, оставени валкани, разрушени, а навечер дури и морбидни за минувачите поради недостигот на осветлување во вечерните часови.

Пешаците веќе подолго време ги одбегнуваат овие премини, заобиколуваат, излегуваат порано за на училиште или за на работа и одат преку други алтернативни и подолги траси на движење, додека, пак, некои од нив секојдневно ризикуваат и претрчуваат преку булеварот со цел да го скратат нивното патување до посакуваната локација.

Екипата на „Слободен печат“ утрово отиде на терен и помина низ овие подземни премини, каде ја забележа ужасната состојба во која тие се наоѓаат.

Една од овие подземни пешачки патеки се наоѓа под надвозникот каде поминува булеварот Киро Глигоров, близу средните училишта „Боро Петрушевски“(АСУЦ) и Средно електротехничко училиште „Михајло Пупин“ (СЕТУ), чии ученици најмногу го користат овој премин. Состојбата во која го затекнавме преминот беше далеку од пристојна. Насекаде можат да се забележат графити, искинати кабли за електрична енергија, искршени плочки, оштетени скалила, исчкртани ѕидови и уништени тавани.

Ужасната миризба, пак, според случајните минувачи е предизвикана и е толку силна и нападна од константното уринирање на несовесните граѓани, а некои од минувачите додадоа дека неколку пати низ преминот забележале и искористени шприцови и игли, работи кои, според нив, не треба да бидат во видикот на ниту еден човек, а најмалку за малолетни средношколци.

Некои од нив чекаат автобус на таа постојка, додека пак останатите живеат во Автокоманда и единствено оттаму можат да стигнат до својот дом. Фреквентноста на пешаци со текот на годините значително се намалува, тврдат минувачите за „Слободен печат“.

Вториот премин, лоциран точно пред бараките на Општина Гази Баба, веднаш наспроти хотел „Континентал“ и трговскиот центар „Ист Гејт“, е во релативно подобра состојба од оној кај АСУЦ. Овде минувачите можат да забележат пекара која постојано работи, но и неколку отворени фотокопирници, најчесто користени од студентите на Природно – математичкиот факултет(ПМФ) и Хемискиот факултет, кои се отворени до попладневните часови од денот.

Студентка на ПМФ која секојдневно поминува оттука вели дека го користи преминот, повеќе за фотокопирање материјали отколку за поминување, и смета дека главен проблем претставува отсуството на дневна светлина и осветлување во ноќните часови, кога преминот е целосно замрачен.

Го користиме преминот, најчесто бидејќи таму ни се најблиските фотокопирници каде ги копираме учебниците кои ни се потребни за испит, но и за различни канцелариски материјали. Оттука обично избегнуваме да поминуваме по попладневните предавања, бидејќи навечер не е осветлено и на моменти е страшно за девојче само да оди низ темниот премин. Сепак, само оттука можам да дојдам до автобуската постојка од каде се качувам во автобус за да одам дома, немаме од каде на друг начин да стигнеме до неа освен одовде- вели студентката за „Слободен печат“.

Испративме прашања до општина Гази Баба и Град Скопје околу тоа кој ја има надлежноста за решавање на овој проблем и кому треба да се обратат граѓаните кои ги користат овие премини, но одговор од нив за решавањето на овој проблем, за жал, не добивме.