Почетокот на новата година е прилика за остварување на сите желби кои не сме успеале да ги оствариме минатата година. Многумина практикуваат да ги запишуваат своите желби и цели во првите денови од годината и да се водат според нив во текот на годината. „Слободен печат“ направи анкета во која ги праша граѓаните што очекуваат од новата 2025 година и дали имаат некои желби кои би сакале да им се остварат.

Најчестите желби кои ги слушнавме од граѓаните беа повеќе здравје, многу среќа, успеси и да прекинат сите војни во светот.

– Имам голема желба која сакам да ми се оствари – да нема војна, да има мир, да има комуникација со луѓето како порано што се дружевме, а јас тоа не знам дали ќе се оствари – изјави една пензионерка.

Една од анкетираните посака да има повеќе насмевки на лицата на луѓето и помалку намуртени лица.

Друга случајна минувачка посака да ја служи здравјето во текот на целата година.

– Сите посакуваме пред сè најдобро здравје да имаме, да ни биде жива и здрава фамилијата, и дај Боже да се средуваат работите во светот глобално, не само кај нас – изјави една повозрасна госпоѓа.