Долги години забавниот Луна парк во центарот на Скопје е надвор од функција. Со промената на власта и градоначалниците, Луна паркот сѐ уште остана како рушевина, а најмладите генерации останаа без основното катче за игра.

„Слободен печат“ направи анкета во која ги праша граѓаните што мислат на оваа тема, дали очекуваат идниот градоначалник конечно да отвори Луна парк, дали им недостасува ова место и дали сметаат дека треба да се обнови бидејќи скоро сите кандидати за градоначалници на Скопје го имаат во својата изборна програма.

Сите испитаници едногласно се согласија дека е време да се обнови и да се стави во употреба Луна паркот. Меѓу анкетираните наидовме и на министерот за култура Зоран Љутков, кој тврдеше дека луна паркот ќе се отвори.

-Следниот градоначалник на Скопје ќе биде Орце Ѓорѓиевски и ќе го отвори Луна паркот конечно– изјави минстерот Љутков.

Граѓаните оптимистички гледаа кон новите кандидати за градоначалници на Скопје, велејќи дека очекуваат во следниот мандат новиот градоначалник да го оствари ова долгогодишно ветување.

На прашањето дали Луна паркот му недостасува на Скопје како главен град, граѓаните одговорија:

-Да дефинитивно му недостастува Луна паркот на Скопје. Особено на помладите генерации кои воопшто не оделе во него, навистина пропуштиле многу– вели еден од анкетираните.

Потсетувајќи се на некои поубави и позабавни времиња, граѓаните ни споделија дел од нивните спомени кои ги поврзуваат со Луна паркот:

– Имам убави спомени од таму, со многу дрвја и шума, кои сега се исечени – изјави еден повозрасен граѓанин.