Скопската Зоолошка градина остана без една од двете слоници кои во 2018 година беа донесени од Белгија. Од Градината предмалку се огласија со официјално соопштение, откако уште утринава по социјалните мрежи кружеше видео кое ја вознемири јавноста, во кое се гледа како мртвото животно со багер се товари на камион за да се однесе во Дрисла. Всушност, како што велат од Зоолошка, слоницата е евтанизирана поради низа здравствени проблеми.

Со голема жалост ве информираме дека во текот на вчерашниот ден (06.08.2024 год.), азиската слоница Дуња по насока на сопствениците кои ја позајмија на нашата зоолошка- „Пери Деза“ Белгија, одлучија со тимот експерти (ветеринар, офтамолог и сениор зоо негувател на тимот за слонови) кои изминатите денови ја прегледуваа слоницата донесоа одлука за евтаназија на слоницата. Ниту еден третман ниту операција не можеше да ја спаси, а одлуката на сопствениците од Белгија беше од стручниот меѓународен тим за да таа не страда. Последнава година слоницата Дуња појавуваше симптоми на длабока старост и изнемоштеност и се констатираа повеќе здравствени проблеми кај Дуња, типични за шеестгодишна слоница. Дуња скоро и да не гледаше, имаше проблеми со вилицата и забите, а ден претходно беше направен преглед и констатиран е комплексен дентален проблем. За процесот на обдукција и останките, Зоолошка градина Скопје ги следеше законите и правилата, како и консултации со тим од Факултетот за ветеринарна медицина – информираа од Зоолошка градина.

Дуња и Даела во скопската градина од Белгија стигнаа во 2018 година. Азиската слоница Дуња тогаш имаше 50-тина , а африканската слоница Даела 30 години. Двете пред да бидат згрижени во белгиската Зоолошка градина со години биле користени во циркуски точки.

 Нашата Дуња најголем дел од својот живот го има поминато во шведски патувачки циркус, патувајќи низ цела Европа. Со забраната за користење на животни во циркуси точки, оттаму Дуња и Даела патуваат во Белгија, во еден од најубавите паркови за слонови во светот- „Пари Деза”, каде се констатира дека за жал поради трауматичното минато двете слоници Дуња и Даела нема да можат да живеат во социјална група со други слонови. Оттогаш, во 2018 година доаѓаат во Скопје за да ги живеат нивните „пензионерски денови”. Посетителите на Скопје ЗОО од 29.09.2018 имаа прилика да уживаат и да се едуцираат со нивното присуство, а од вчера ја имаме самп нашата африканска слоница Даела, за чиј статус дополнително ќе се одлучи заедно со европската група за слонови – велат од скопската ЗОО.

Но, смртта на слоницата не само што ги вознемири граѓаните кои од утрово бараа одговори за тоа што се случува во градината, туку предизвика и реакции од политичари и политички партии. Градоначалникот на Општина Гази Баба, Бобан Стефковски смета дека Скопје и скопјани не го заслужуваат ова.

Утрово сите нас не дочека веста дека угинала една од слониците во Зоолошката градина што не е прв скандал во функционирањето на институцијата во последниот период. Жално и крајно неодговорно е однесувањето на менаџментот на Зоолошката градина, а секако и на градоначалничката Арсовска да се сокрие од јавноста еден ваков случај, напиша меѓу другото Стефковски на Фејсбук.

Се огласија и од СДСМ со став дека е жално ова што се случува во скопската Зоолошка градина и дека местото кое до пред три години беше на сите насловни страници во светските медиуми, кое беше пример за добар менаџмент и грижа за животните, ВМРО-ДПМНЕ и нивната најдобра менаџерка Данела го претворија во хорор филм.

 Видеото кое кружи по социјалните мрежи од транспортот на животното до Дрисла е врв на изживувањето. Во последните месеци и години угинаа многу животни, две жирафи, тигар, коњи и други животни – соопштија од партијата нагласувајќи дека ВМРО-ДПМНЕ и Мицкоски, кои Данела Арсовска на граѓаните им ја продадоа како најдобрата менаџерка, а потоа се скараа заради бизнис интереси, треба да одговараат за оваа нечовечност.

„Слободен печат“ во рамките на серијата репортажи од скопската ЗОО градина, имаше можност да ја сними Дуња, во нејзините последни денови. Погледнете…