Група жители на скопската населба Карпош вечерва одржаа протест на кој изразија незадоволство од владината одлука со која салата „Наум Наумовски-Борче“, некогаш сала на Друштвото за телесно воспитување „Партизан“, ѝ се одзема од трајно користење на Општината Карпош.

Под мотото „Партизан не го даваме“, граѓаните се спротивставија на потегот на Владата, наведувајќи дека станува збор за објект од особено значење за заедницата, во кој вложиле значителни средства.

На вечерашниот собир се обратија и градоначалникот на Карпош, Стевчо Јакимовски, како и неколкумина советници во Општина Карпош од различни политички групации, кои ги поддржуваат граѓанските напори таа да остане под општината.

Салата „Партизан“ со години стоеше руинирана, пред иницијативата за нејзин спас и обнова, која започна во 2019 година. Потоа салата беше вратена во владение на општината, а локалната власт во соработка со здружението „Културно ехо“ спроведе анкета за избор на идејно решение за реконструкција, која се развлече низ неколку години.

Јакимовски: Владата на каубојски начин ни ја одзема салата „Партизан“, без образложение и само од ќеф