Откако македонската јавност беше разбранувана по изјавата на државната секретарка за европски прашања на Португалија, Ана Паула Закаријаш, каде вели дека македонскиот јазик некогаш бил дел од бугарскиот, денес порталот СДК објави аудио снимка која открива уште поскандалозни аспекти.

Државната секретарка за европски прашања Закаријаш на брифинг со новинари во Брисел вели „Северномакедонскиот јазик некогаш бил дел од бугарскиот јазик“. Оригиналниот аудио запис што го пренесува порталот СДК го прави беспредметен демантот на португалската амбасадорка во земјава, Марија Виржинија Мендес да Силва Пина, дека Закаријаш не дала изјава каква што пренесе Бугарското национално радио.

– Навистина е тешка дебатата, особено за Бугарија, поврзано е со историјата, културниот идентитет, идентитетот на двете земји и соработката во иднина. Сега, тие работат на еден вид на патоказ кој ќе овозможи да продолжат со работа и Бугарија да добие гаранции дека кога Северна Македонија ќе влезе во ЕУ работите ќе се одвиваат непречено. Северна Македонија имаше и тешки преговори со Грција, паметите дека го променија името на својата земја и навистина е тешко, бидејќи е поврзано и со Бугарија во однос на културата и јазикот. Очигледно е поврзано со тоа дека северномакедонскиот јазик некогаш бил дел од бугарскиот јазик и со културните димензии на двете земји, вели Закаријаш, одговарајќи на новинарско прашање поставено од Бугарското национално радио.

Закаријаш покажува толеранција и разбирање за бугарската позиција кон земјава.

– Ние мора да ја почитуваме позицијата на Бугарија и тоа и го направивме. Многу е важно да не внесуваме во ЕУ билатерални недоразбирана, оти тие треба да бидат решени пред нова земја да се приклучи на Унијата. Затоа, не бевме во можност да ги започнеме преговорите, бидејќи мора да ѝ дадеме време на Бугарија да го реши ова со Северна Македонија пред да се одржи првата меѓувладина конференција“, вели Закаријаш.