Во Тетово традиционално и годинава Богојавленските празници започнаа со спуштање на светиот крст во црковниот базен во православниот храм Света Богородица. Ваквата традиција како што раскажуваат од црковниот одбор е востановена во 1986 година и единствено во Тетово, крстот се фрла денеска на празникот Водокрст како и утре на Водици.

„Нашиот другар и пријател горномалец Сашо Васоски донираше пари и го направивме базенот. Оттогаш почнавме редовно да го фрламе крстот на 18 јануари на Водокрст. Побаравме од владиката покојни Кирил благослов, тој ни даде благослов. Две години имаше прекин и претходно имаше прекин во 2001 година поради воениот конфликт, така во овој период само 3 години не сме ја одржиле оваа традиција. Одлучиле од тетовското архирејско намесништво да се фрла крстот на денешен ден, за да не се делат граѓаните некои да одат во една црква некои во друга и трета, одлучено е тука во Богородица да има фрлање на крст ден претходно. Порано само вода крстевме пред да го направиме базенот. Порано имало фрлање на крст во река Пена, таа традиција која е сега прекината е пред еден век, кај гимназија кај мостот се фрлал крстот. Една година им загинал крстот, а потоа пронајден е истиот тој крст при ископ на песок, сега е во една куќа тој крст во едно тетовско семејство. Знали оваа традиција на фрлање на крст е многу стара“, изјави Небојша Неделковиќ од црковниот одбор на црквата Пресвета Богородица.

По крстот во црковниот базен, годинава се фрлија тројца верници, а најсреќен кој го фати светиот крст беше беше тетовецот Димитар Спасевски.

„Првпат се фрлам по крстот, господ како на мене така и на сите да ми даде здравје и бериќет. Младите повеќе да бидат активни и да доаѓаат на црковни богослужби“ рече Спасевски.

Од Тетовското архирејско намесништво велат дека нема ништо спорно со денешното фрлање на крстот, оти тоа е благословено, затоа што на Водокрст се осветиле и водите на реката Јордан.

По повод Водокрст, митрополитот на тетовско-гостиварската епархија Господин Јосиф, отслужи света Боженствена литургија.

Во тетовско утре на празникот Водици, крстот ќе се спушта во сите црковни базени во православните храмови.

За првпат крстот во реката Пена на Водици е фрлен во 1935 година. Но, оваа традиција траела само 6 години. Во 1941 година крстот се загубил, кога свештеникот го спуштил во брзите и големите води на реката Пена. Верниците не можеле да го најдат. Според верувањата, сето ова било предзнак дека ќе се слуши нешто лошо. За 3 месеци, на 6 април истата година, започнала Втората светска војна.

Ваквата традиција наредните години не продолжила, од страв дека крстот ќе се загуби и повторно ќе се случи немил настан. Оттогаш наместо во река, светиот крст во Тетово започнал да се фрла во црковните базени.