И утрово гори на депонијата Вардариште. Се шири густ чад во воздухот и неподнослива смрдеа.

Граѓаните на Аеродром и Ново Лисиче се жалат на отежнато дишење, велат дека пожарот се уште не е изгаснат и дека од неделата не дошле екипи да гаснат.

„До 8 часот утрово во Ново Лисиче беше опасно да се отвори прозорец. Мирисаше на канта ѓубре“ вели граѓанин.

Утрово можеа да се забележат луѓе како одат на работа со маски на лицето поради загадениот воздух.

Од видеото кое за „Слободен печат“ го испрати граѓанин, може да се види дека состојбата е алармантна.

Жителите на Аеродром веќе три дена протестираат против загадувањето што доаѓа од Вардариште. Се собираат кај мостот „Киро Глигоров“, ја блокираат крстосницата и бараат институциите да преземат итни мерки. Ги повикуваат и граѓаните од другите скопски населби да им се придружат, со оглед дека загадувањето се шири низ целиот град.

Протести ќе има и денес од 18 часот и како што најавуваат ќе продолжат сѐ додека не се најде трајно решение за еколошката бомба во срцето на главниот град.

Каде ќе го скриете срамот за „Вардариште“?