Јужниот руски граничен регион Белгород е погоден од нови украински напади со беспилотни летала, изјави гувернерот Вјачеслав Гладков, додавајќи дека неколку лица се повредени. Како што јавуваат медиумите градот Белгород, исто така, беше цел на беспилотни летала во среда.

Гладков изјави на својот официјален канал на Телеграм дека жителите на Белгород минуваат низ „нешто што никогаш порано не го доживеале во модерната историја“, опишувајќи ги повторените напади врз зградата на регионалната влада.

Според него, дроновите ги погодиле горните катови од зградата, оштетувајќи ја неговата канцеларија и просториите на регионалната Дума. Само неколку вработени останале во зградата, додека останатите биле евакуирани и им било наложено да работат од дома.

Гувернерот, исто така, сподели видео од напад со беспилотно летало врз автомобил во градот. Во инцидентот наводно биле повредени тројца луѓе.

Други напади со беспилотни летала оштетиле неколку станбени згради, продавница и шест возила. Во селото Разумное во Белгородската област, една жена била повредена кога украински дрон ја погодил нејзината куќа.

Во среда, гувернерот објави дека беспилотни летала го нападнале и градот и регионот Белгород, при што се повредени осум цивили и пет вработени во државната компанија „Орлан“.

Како одговор на ситуацијата, властите во Белгород им наредија на сите државни институции да работат од дома во четврток и петок. Големите трговски центри ќе бидат затворени до сабота, а сите јавни настани ќе бидат откажани до недела. Парковите, плажите и другите места за собирање ќе бидат затворени во следните два дена. На приватните бизниси им е советувано да ги спроведат истите мерки, а на жителите им се советува да поминуваат што е можно помалку време на отворено.

Истражниот комитет на Русија отвори кривична постапка за тероризам поради нападот во Белгород.