Украина
Фото: Твитер

ВИДЕО: Украина тврди дека соборила руски авион „Су-34“, се појави и наводна снимка

Украинската армија тврди дека денеска соборила руски ловец-бомбардер од типот „Су-34“ во Доњецката област, а Русија потврди соборување на авион и додаде дека „двајцата пилоти се катапултирале“, но не прецизираше чиј е авионот, ниту за каков модел станува збор.

Како што соопштија украинските воздухопловни сили, руски борбен авион се урна на истокот на Доњецк, погоден во близина на градот Јанакив, на околу 50 километри од самиот град Доњецк, на територијата контролирана од Русија, пренесува „Си-ен-ен“.

На социјалните мрежи се појави наводна снимка од соборувањето на модерниот воен авион, вреден 36 милиони долари.

Рускиот воен функционер мајор Роман Краменков преку својот канал на Телеграм објави дека „еден авион е соборен“ над Јанакив, во таканаречената Доњецка Народна Република, пренесе ТАСС.

Според непотврдени извештаи од вечерва, еден од пилотите загинал и покрај катапултирањето. Засега не може да се потврдат ниту тврдењата на украинските воздухопловни сили за потеклото на авионот и моделот.

Краменков соопшти дека го посетил местото на несреќата, но дека во моментов не може да се пристапи до остатоците од авионот.

– Авионот се урна, има чад, гори. Видовме двајца пилоти како се катапултираат со падобрани, изјави рускиот мајор за руската државна телевизија. Според него, никој не е повреден бидејќи авионот се урнал на земјоделска фарма.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот