ВИДЕО: Три љубопитни чавки и стаорец на пешачка патека во Скопје
Скопје има многу маани, а многумина би се согласиле дека неговиот раст и развој оди во погрешна насока. Сепак, одвреме-навреме има и охрабрувачки сигнали дека тој полека се претвора во метропола. Таков знак е забележан на видеото кое ни го испрати читателка, на кое се гледа како, слично на ситуацијата во големите светски градови како Њујорк или Париз, и скопските стаорци имаат сè помалку страв да се појавуваат меѓу луѓе и среде бел ден.
Препорачано
На снимката од населбата Ново Лисиче се гледаат три чавки, кои и самите изгледаат изненадени што го гледаат глодарот на патеката. Тие, се чини, љубопитно го испитуваат стаорецот, а тој не е премногу загрижен од нивното присуство.
Во време кога жителите на Скопје речиси едногласно констатираат дека состојбата со хигиената во градот не била полоша, а тие постојано се жалат и на нередовно подигање на сметот и преполните контејнери, зголемениот број на стаорци не треба да изненадува.
Според Светската здравствена организација (СЗО), недоволно ефикасното управување со отпадот во урбаните средини создава идеални услови за размножување на стаорците, кои лесно доаѓаат до храна и засолниште меѓу купиштата ѓубре. Нередовното собирање на сметот и нефункционалните контејнери директно придонесуваат за појава на глодарски инфекции и зголемен здравствен ризик за жителите, наведено е во повеќе документи на СЗО.
